Politoloq Elçin Mirzəbəyli: “Azərbaycana qarşı bir dəfə oynanılan oyunun təkrar həyata keçirilməsi üçün nə zəmin var, nə də imkan”
Ermənistan Xarici İşlər Nazirliyi Ermənistan və Azərbaycan arasında sülh sazişinin imzalanması üçün danışıqların təşkili ilə bağlı ATƏT-in Minsk Qrupunun həmsədrliyinə müraciət edib. Ermənistan XİN bunu “BMT Nizamnaməsinə, Mülki və Siyasi Hüquqlar haqqında Beynəlxalq Pakt və Helsinki Yekun Aktına uyğun olaraq” etdiyini bildirib.
Bu, əlbəttə ki, çoxdan tarix olan ATƏT-in Minsk Qrupunu növbəti dəfə diriltmək cəhdidir. Belə ki, rəsmi Bakı İkinci Qarabağ müharibəsindən sonra Minsk Qrupunun vasitəçiliyinə ehtiyac olmadığını bəyan edib.
Buradan belə nəticə hasil olur ki, Ermənistan növbəti hiyləgər gedişlə sülhdən boyun qaçırmağa çalışır.
Elçin Mirzəbəyli
Politoloq Elçin Mirzəbəyli “Yeni Müsavat”a bildirdi ki, Ermənistanın həm müharibədən, həm də 10 noyabr 2020-ci il bəyanatının imzalanmasından dərhal sonra ATƏT-in Minsk Qrupunun prosesə cəlb edilməsi istiqamətində göstərdiyi cəhdlərin məqsədi qeyri-müəyyən vəziyyəti onların qənaətinə görə, nə zamansa yarana biləcək əlverişli situasiyaya qədər uzatmaqdan ibarətdir: “Azərbaycanın bununla bağlı mövqeyi aydındır. Digər tərəfdən, Azərbaycanla Ermənistan arasındakı tənzimlənməsinə və razılaşdırılmasına ehtiyac duyulan məsələlərin heç birinin ATƏT-in Minsk Qrupu həmsədrlərinin mandatına aidiyyəti yoxdur. Əslində son günlər Rusiya sülhməramlılarının müvəqqəti səlahiyyət zonasındakı separatçıların fəallaşmasının da təməlində dayanan səbəblərdən biri Minsk Qrupu həmsədrlərinin prosesə cəlb edilməsi üçün zəmin yaratmaqdan ibarətdir. Hesab edirəm ki, Azərbaycana qarşı bir dəfə oynanılan oyunun təkrar həyata keçirilməsi üçün nə zəmin var, nə də imkan. Ola bilsin ki, hətta Rusiyada da kimlərsə Ukraynadakı rəzalətlərini ”kompensasiya" etmək üçün Azərbaycan torpaqlarında yaşayan etnik erməniləri yenidən piştaxta üzərinə çıxarmaq istəyirlər. Əgər belə bir niyyət varsa, bu indidən məhvə məhkumdur. Çünki Ukraynanın ərazi bütövlüyü və separatizmə qarşı qlobal etiraz kontekstində erməni separatçılarının “mükafatlandırılması” mümkün deyil".
Politoloq qeyd etdi ki, bu xüsusda qardaş Türkiyənin getdikcə artan rolunu qeyd etmək və xarici işlər naziri hörmətli Mövlud Çavuşoğlunun mesajını da nəzərə almaq lazımdır: “Çavuşoğlu imperativ şəkildə bəyan etdi ki, Azərbaycanla Ermənistan arasındakı məsələləri bu iki dövlətin özü çözməlidir.
Daha öncə də qeyd etdiyim kimi, Minsk Qrupu həmsədrlərinə ATƏT-in fəaliyyətdə olan sədri tərəfindən 1995-ci ildə verilən mandat var. 15 bənddən olan bu mandata Azərbaycanla Ermənistan arasındakı sərhədlərin delimitasiyası, sülh müqaviləsi və digər bu kimi məsələlər daxil deyil. Bununla yanaşı, Azərbaycan sülh müqaviləsi üçün 5 bənddən ibarət şərtlərini də açıqlayıb. Bu şərtlərdə yer alan məqamlar da həmsədrlərin mandatında yer almayıb. İndiki halda Minsk Qrupu həmsədrlərinin prosesdə iştirakı bu və ya digər şəkildə o zaman mümkün ola bilər ki, ATƏT-in xarici işlər nazirlərinin toplantısında belə bir qərar qəbul edilsin və fəaliyyətdə olan sədr də həmsədrlərə mövcud reallıqlara uyğun gələn problemləri əhatə edən mandat versin. Onu da deyim ki, ATƏT-də qərarlar konsensus yolu ilə qəbul edildiyi üçün belə bir məsələnin gündəmə gətirilməsi və qərar qəbul edilməsi istisna olunur".
E.Mirzəbəyli hesab edir ki, Azərbaycanın sülh prosesini əngəllədiyini söyləmək üçün də hər hansı bir əsas yoxdur: “Hazırkı durumda Azərbaycan və Ermənistan, həmçinin Türkiyə və Ermənistan arasında müzakirələrin aparılması üçün bütün diplomatik kanalların açıq olduğunu nəzərə alsaq, prosesdə hansısa vasitəçinin iştirakına heç bir ehtiyac yoxdur. Qənaətimə görə, mövcud reallıqlar çərçivəsində ABŞ və Fransa sülh prosesinin ikitərəfli qaydada aparılmasını qəbul edəcəklər”.
Etibar SEYİDAĞA,
“Yeni Müsavat”
