Birləşmiş Ərəb Əmirliklərinin şirkətləri son altı ayda Türkiyədə gəmiçilik, gəmilərə texniki qulluq və balıqçılıq sektorlarında böyük aktivlər əldə ediblər.
Musavat.com xəbər verir ki, “Dünya” qəzetinin yazdığına görə, 2023-cü ilin payızında Əmirliyin investisiya şirkəti “E20 İnvestment” Türkiyənin aparıcı dəniz bas və dorado istehsalçılarından biri, əsasən Avropa bazarında fəaliyyət göstərən “Lucky Fish” şirkətinin 70 faizini satın alıb.
Dekabrın sonunda BƏƏ-nin dəniz və gəmiçilik şirkəti Gulf Navigation Holding (GULFNAV) ilə Türkiyənin “Polimar” gəmiçilik şirkətinin bütün səhmlərini almaq üçün müqavilə bağlanıb. Bu şirkət limanlarda, boğazlarda dəniz gəmilərinə xidmət göstərmək üçün geniş xidmətlər təklif edir və beynəlxalq logistika təmin edir. GULFNAV əvvəllər şirkətin aktivlərinin 60 faizinə sahib idi və dekabrın sonunda qalan 40 faizi almaq üçün müqavilə bağlayıb. Əmirlik holdinqi üçün bu satınalma, dəniz agenti biznesini genişləndirməklə və inteqrasiya olunmuş logistik həllər portfelini gücləndirməklə şirkətin gələcək illərdə böyüməsinə töhfə verəcək strateji investisiyadır.
Qəzetin yazdığına görə, dünyanın ən böyük liman operatorlarından biri olan Əmirliyin DP World şirkəti 18 il əvvəl Türkiyənin Kocaeli vilayətində torpaq alaraq Yarımca limanını tikib. Ötən müddətdə liman mühüm regional ticarət mərkəzinə çevrilib. Lakin o vaxtdan bəri BƏƏ Türkiyədəki gəmiçilik və gəmilərə xidmət aktivlərini artırmaq üçün heç bir əhəmiyyətli addım atmayıb.
Bu prosesin intensivləşməsi ötən ilin ikinci yarısında Türkiyə ilə BƏƏ arasında investisiyalarla bağlı sazişlər və memorandumlar paketinin imzalanması ilə başlayıb. Yaxın bir neçə ildə əmirliklərin Türkiyəyə təxminən 50 milyard dollar sərmayə qoyacağı gözlənilir. Bu məbləğin əhəmiyyətli hissəsinin enerji layihələrinə, eləcə də dəniz logistikası və xidmətlərinə yatırılması planlaşdırılır.
Musavat.com
