HƏMAS-a qarşı hərbi əməliyyat həyata keçirən İsrailə Almaniyanın silah ixracı son bir ayda artıb. Musavat.com Financial Times-a istinadən xəbər verir ki, Almaniya bu il İsrailə 300 milyon avro dəyərində həssas hərbi texnika və silah ixrac edib ki, bu da 2022-ci illə müqayisədə 10 dəfə çoxdur. Hökumət sözçüsü nəşrə bildirib ki, bu il verilmiş 218 lisenziyadan 185-i HƏMAS-ın oktyabrın 7-də Qəzzadan qəfil hücuma başlamasından sonra təsdiqlənib.
Almaniya kansleri Olaf Şols İsrailin Fələstin terror qruplaşmasına qarşı böyük hərbi güclə cavab vermək hüququnun ən qatı müdafiəçilərindən biridir.
Berlindəki hökumət rəsmiləri bildiriblər ki, federal hökumət İsrailin silah tədarükü tələblərini sürətləndirmək üçün Xarici İşlər Nazirliyi, İqtisadiyyat Nazirliyi və İxrac Nəzarəti İdarəsindən ibarət işçi qrup yaradıb. Lisenziyalar hava hücumundan müdafiə sistemləri üçün komponentlər kimi heç də hücum xarakterli olmayan geniş hərbi texnikanı əhatə edir. Bununla belə, təxminən 20 milyon avro dəyərində öldürücü sursat da göndərilib.
İxracla bağlı açıqlanan rəqəmlərə lisenziya tələb etməyən avadanlıq, məsələn, əsas fərdi ilk yardım dəsti, qoruyucu şəxsi zireh və ya tibbi avadanlıq daxil deyil.
Musavat.com
