Almaniyanın ifrat sağçı Almaniya üçün Alternativ (AfD) partiyasının yüksəkvəzifəli deputatı Martin Reyxardt nasist salamı verməsi ilə bağlı yayılan foto səbəbindən ciddi tənqidlərlə üzləşib.
Musavat.com xəbər verir ki, bu barədə "Politico" məlumat yayıb.
Nəşrin yazdığına görə, altı il əvvəl çəkilmiş və indiyədək yayımlanmayan fotoda Almaniya Bundestaqının deputatı Martin Reyxardtın sol əlini nasist salamına bənzər şəkildə qaldırdığı görünür. Reyxardt isə ittihamları rədd edərək bunun zarafat xarakterli hərəkət olduğunu bildirib.
Məqalədə qeyd olunur ki, tədbirdə iştirak edən iki nəfər anonim şəkildə fotodakı jestin məhz nasist salamı kimi nəzərdə tutulduğunu təsdiqləyib. Reyxardt isə bunun "yumoristik cəngavərlik mərasimi"nin bir hissəsi olduğunu deyib.
Hadisənin digər iştirakçısı Markus Moçmann da fotonun həqiqi olduğunu təsdiqləyib, lakin baş verənlərin zarafat məqsədi daşıdığını bildirib. Onun sözlərinə görə, məsələ əsassız şəkildə şişirdilir.
Qalmaqal sentyabrda Almaniyanın şərqində keçiriləcək mühüm əyalət seçkiləri ərəfəsində baş verib. Hazırda sorğulara əsasən, AfD həmin regionlarda lider mövqedədir və xüsusilə Saksoniya-Anhalt əyalətində parlamentdə mütləq çoxluq qazanmaq şansını qoruyur.
Almaniyanın hakim Xristian Demokrat İttifaqı (CDU) nümayəndələri isə fotoya sərt reaksiya veriblər. Saksoniya-Anhaltın baş naziri Sven Şultse bildirib ki, nasist salamı təsadüfi hərəkət deyil, siyasi mövqenin ifadəsidir və belə şəxslərin parlamentdə yeri yoxdur.
Bununla belə, nəşr qeyd edir ki, əvvəlki oxşar qalmaqallar AfD-nin reytinqinə ciddi təsir göstərməyib və partiya ölkə üzrə sorğularda yüksəlişini davam etdirir.
Məqalədə AfD-nin digər deputatı Mattias Musdorfun da 2023-cü ildə Bundestaq binasında nasist salamı verməkdə ittiham olunduğu xatırladılır. Onun işi üzrə məhkəmə prosesinin bu ilin oktyabrında keçiriləcəyi bildirilir. Musdorf da ittihamları rədd edir.
"Politico" vurğulayır ki, Almaniya qanunvericiliyinə əsasən, nasist simvollarının və nasist salamının ictimai nümayişi cinayət hesab olunur. Məhkəmələr belə işlərə baxarkən jestin sağ və ya sol əllə edilməsindən deyil, obyektiv müşahidəçinin onu nasist salamı kimi qəbul edib-etməyəcəyindən çıxış edirlər.
Musavat.com
