“Meta”nın baş icraçı direktoru və təsisçisi Mark Zukerberq bu il dividend ödənişlərindən təxminən 700 milyon dollar əldə edə bilər.
Musavat.com Bloombergə istinadən xəbər verir ki, bir gün əvvəl Meta şirkətin tarixində ilk dəfə hər səhmə 50 sent məbləğində rüblük dividend elan edib.
Agentlik hesab edir ki, Zukerberq Meta səhmlərinin təxminən 13 faizinə və ya təxminən 350 milyon səhmə sahibdir və onun dividend gəliri vergilərdən əvvəl hər rübdə təxminən 175 milyon dollar olacaq.
Meta-nın səhmləri son 12 ayda maliyyə göstəricilərinin bərpası və 21.000-ə yaxın işçinin işdən çıxarılması da daxil olmaqla, genişmiqyaslı xərclərin azaldılması tədbirləri sayəsində iki dəfədən çox dəyər qazanıb.
Sərvəti 125 milyard dollar olaraq qiymətləndirilən Zukerberq 2022-ci ildə 27,1 milyon dollar mükafat alıb, baxmayaraq ki, onun şirkətdəki baza maaşı 1 dollardır. Onun 2023-cü il üçün maaşı daha sonra açıqlanacaq.
Biznesmen və həyat yoldaşı Priscilla Chan əvvəllər vəsaitlərinin 99 faizini xeyriyyəçiliyə ayıracaqlarına söz vermişdilər. Onların qurduqları xeyriyyə cəmiyyətləri bərabərliyi təbliğ edir, xəstəliklərlə mübarizə aparır, əlverişli mənzil tikir və digər təşəbbüslərlə məşğul olur.
Musavat.com
