Ankarada keçiriləcək NATO Sammiti ərəfəsində ABŞ-ın alyansdakı gələcəyi ilə bağlı mühüm açıqlama verilib.
Musavat.com xəbər verir ki, ABŞ-ın NATO-dakı səfiri Metyu Uitaker Vaşinqtonun alyansdan çıxmağı planlaşdırmadığını, lakin müttəfiq ölkələrin daha çox məsuliyyət daşıması üçün ABŞ-ın NATO-dakı rolunun azaldılması variantlarının nəzərdən keçirildiyini bildirib.
Uitaker xatırladıb ki, ABŞ Prezidenti Donald Tramp uzun müddətdir NATO üzvlərini müdafiə xərclərini artırmağa çağırır. Onun sözlərinə görə, Vaşinqton müttəfiqlərin hərbi imkanlarını gücləndirərək alyans daxilində daha böyük məsuliyyət götürməsini gözləyir.
ABŞ-ın NATO-dan çıxacağı ilə bağlı iddialara münasibət bildirən diplomat deyib:
"Birləşmiş Ştatlar NATO-dan çıxmağı planlaşdırmır. Lakin alyans daxilində daha az rol oynamağın yollarını fəal şəkildə araşdırırıq".
O vurğulayıb ki, məqsəd ABŞ-ın üzərinə düşən yükün müttəfiqlər arasında daha balanslı şəkildə bölüşdürülməsi və NATO-nun uzunmüddətli perspektivdə daha güclü və dayanıqlı olmasıdır.
Uitaker sonda qeyd edib ki, sülhü qorumağın yolu güclü müdafiədən keçir. Onun sözlərinə görə, NATO üzvləri birlik nümayiş etdirməli, müdafiəyə daha çox sərmayə yatırmalı və alyansı gələcəyin təhlükələrinə indidən hazırlamalıdırlar.
Musavat.com
