Bu gün Rusiyanın "Soyuz MS-25" idarə olunan kosmik gəmisi ilə "Soyuz-2.1a" raketi Baykonur kosmodromundan havaya qalxmalı olsa da, uçuş son anda təxirə salınıb.
Musavat.com-un Rusiya mətbuatına istinadən məlumatına görə, raketin havalanması geri sayma başlama vaxtına təxminən 20 saniyə qalmış dayandırılıb.
Buraxılış kosmosa ilk çıxan sovet kosmonavtı Yuri Qaqarinin 90 illik yubileyinə həsr olunub.
NASA verilişinin aparıcısının sözlərinə görə, "Soyuz MS-25" pilotlu kosmik gəmisinin Beynəlxalq Kosmik Stansiyaya (BKS) buraxılması "Soyuz-2.1a" raketinin mühərriklərinin vaxtında işə düşməməsi səbəbindən ləğv edilib: "Kabel dirəyi raketdən uzaqlaşdı, lakin o anda gözlənilən mühərriklər işə düşmədi və avtomatik sistem buraxılışı ləğv etdi".
Rusiya-Belarus-Amerika ekipajı ilə "Soyuz MS-25" kosmik gəmisinin buraxılması üçün ikinci cəhdin martın 23-dən gec olmayaraq baş tutacağı gözlənilir.
21-ci səfər ekspedisiyasının əsas heyətinə Roskosmos dövlət korporasiyasının kosmonavtı Oleq Novitski, NASA astronavtı Treysi Dayson və Belarusdan kosmosa uçuşun ilk iştirakçısı Marina Vasilevskaya daxildir. Onların ehtiyat heyəti belaruslu Anastasiya Lenkova, kosmonavt İvan Vaqner və NASA-nın ən yaşlı aktiv astronavtı olan Donald Pettit idi.
Novitsky və Vasilevskayanın BKS-də təxminən iki həftə qalması və NASA astronavtı Laurel O'Hara ilə birlikdə "Soyuz MS-24" kosmik gəmisində Yerə qayıtması, Dayson missiyasının isə daha uzun sürəcəyi gözlənilir. O, sentyabra qədər orbital stansiyada qalacaq və Oleq Kononenko və Nikolay Çubla birlikdə "Soyuz MS-25" kosmik gəmisində geri uçacaq.
Musavat.com
