Tacikistanın Bobojon Qafurov rayonunun polis əməkdaşları cadugərlik və falçılıq ittihamı ilə 50-dən çox adamı saxlayıb.
Musavat.com veçerka.tj saytına istinadla xəbər verir ki, bu barədə ölkənin Daxili İşlər Nazirliyi məlumat yayıb.
“Bu ərazidə 51 nəfər saxlanılıb. Qanunu pozanların hər biri pul qazanmaq üçün müxtəlif hiylə və üsullardan istifadə edərək həmin rayonda və qonşu ərazilərdə yaşayan sakinlərə xidmət göstəriblər”, - deyə məlumatda bildirilir.
Mənbənin bildirdiyinə görə, saxlanılan şəxslər barəsində İnzibati Xətalar Məcəlləsinin 482-ci maddəsinin tələblərinin pozulması ilə bağlı protokollar tərtib edilib.
Onlardan biri Gülzorxan Bekmirzoyevaya qarşı isə Cinayət Məcəlləsinin 247-ci (dələduzluq) maddəsi ilə cinayət işi başlanıb.
“O, artıq iki dəfə dələduzluq maddəsi ilə cinayət məsuliyyətinə cəlb olunub. Bu dəfə o, ər-arvad arasındakı gərgin münasibətləri “yumşaltmaq” üçün 700 dollar istədiyinə görə həbs edilib”, – DİN bildirir.
Qeyd edək ki, Qırğızıstanda falçılıq fəaliyyətinin qadağan edilməsinə dair qanunvericilik sənədi hazırlanır.
Musavat.com
