Rusiyanın 4 regionunda sifarişlə çatdırılan salatlardan kütləvi zəhərlənmə halları qeydə alınıb.
Musavat.com Rusiya mətbuatına istinadən xəbər verir ki, söhbət Moskva, Moskva vilayəti, həmçinin Tatarıstan və Nijni Novqoroddan gedir.
Ən çox zəhərlənənlər paytaxtdadır – 121 nəfər. Moskva merinin sosial inkişaf üzrə müavini Anastasiya Rakovanın sözlərinə görə, 55 nəfərin vəziyyəti ağırdır, 30 nəfər reanimasiyadadır.
Nijni Novqorod və Kazanda daha 14 botulizm hadisəsi qeydə alınıb, botulizm şübhəsi ilə 20 xəstə Moskva vilayətində xəstəxanaya yerləşdirilib. Bu günə qədər ümumi halların sayı 150-dən çoxdur. Onların sayı artmaqda davam edir - bəzi məlumatlara görə, təkcə Moskvada hər gün 30-40 xəstə botulizm şübhəsi ilə qeydiyyata alınır.
Moskva vilayətində 20 xəstədən 12-nin vəziyyəti ağır, qalanlarının vəziyyəti orta ağırdır. Nijni Novqorodda 12, Kazanda isə 8 nəfər reanimasiyaya yerləşdirilib.
Bütün xəstələr çatdırılma xidməti vasitəsilə ərzaq məhsulları sifariş ediblər. “Rospotrebnadzor”un məlumatına görə, xəstələr xəstəxanaya girməzdən əvvəl noxud və ya tuna, noxud və alma ilə salat sifariş ediblər. Əvvəlcə mütəxəssislər botulizm bakteriyasının balıq və salat qablarında ola biləcəyini güman edirdilər. “Roskoçestvo” konservləşdirilmiş ton balığı üzərində araşdırma aparıb. Rusiyada botulizm üzrə aparıcı mütəxəssis, infeksionist Vladimir Nikiforov isə bakteriyaların konservləşdirilmiş formada saxlanılan salat komponentlərində olduğunu irəli sürüb.
Daha sonra məlumat ortaya çıxdı ki, zəhərlənməyə səbəb salatların digər tərkib hissəsi - botulinum toksininin əmələ gəldiyi konservləşdirilmiş noxud olub. Eyni zamanda, saxlama standartlarının pozulduğu və ya xammalın əvvəlcə keyfiyyətsiz olub-olmadığı tam aydın deyil. Hazırda salatların satışı dayandırılıb.
Musavat.com
