Türkiyə Xarici İşlər Nazirliyi dərhal atəşkəs tələbi də daxil olmaqla 11 bənddən ibarət Qəzza zolağında vəziyyətin nizamlanması planını təqdim edib.
Musavat.com xəbər verir ki, bu barədə Türkiyənin “Akşam” qəzeti mənbələrə istinadən məlumat yayıb.
Qeyd olunub ki, plan artıq BMT Təhlükəsizlik Şurasının beş daimi üzvünə təqdim edilib.
Məlumata görə, Türkiyənin xarici işlər naziri Hakan Fidan Qəzza üzrə təmas qrupunun üzvlərinə həll planını təklif edib.
Xatırladaq ki, təmas qrupu İslam Əməkdaşlıq Təşkilatının (İƏT) və Ərəb Dövlətləri Liqasının Ər-Riyadda keçirilən sammitindən sonra yaradılıb (Bura yeddi ölkə daxildir: Türkiyə, İndoneziya, Nigeriya, İordaniya, Misir, Qətər və Səudiyyə Ərəbistanı).
Nəşrin məlumatına görə, plan artıq ABŞ dövlət katibi Antoni Blinkenə, həmçinin Rusiya, Çin, Böyük Britaniya və Fransa nümayəndələrinə təqdim edilib.
Belə ki, 11 bənddən ibarət plana dərhal atəşkəs, fasiləsiz humanitar yardımların çatdırılması və səhiyyə sisteminin fəaliyyətinin təmin edilməsi müddəaları daxildir. Planda noyabrın 24-də elan edilən müvəqqəti humanitar yardımın heç bir nəticə vermədiyi qeyd edilib.
Türkiyə rəsmilərinin fikrincə, münaqişə həll edildikdən sonra təhlükəsizliyin təmin edilməsi üçün qarant ölkələrin mexanizmindən istifadə oluna bilər.
Musavat.com
