Premyer Liqada 6-cı turun oyunları sentyabrın 16-17-si aralığında keçiriləcək.
Turun mərkəzi qarşılaşması ayın 17-də "Qarabağ"la "Sabah" arasında baş tutacaq.
Ancaq bu görüş öncədən nəzərdə tutulduğu kimi, "Azərsun Arena"da təşkil olunmayacaq. Ağdam təmsilçisi görüş yerini Tofiq Bəhramov adına Respublika stadionuna dəyişib.
"Köhlən atlılar"ın bu qərarı Avropa Liqasına daha yaxşı hazırlaşmaq niyyətinə xidmət edir.
Belə ki, H qrupunda yer alan “Qarabağ” sentyabrın 21-də burada "Mölde" ilə üz-üzə gələcək. Matç saat 20:45-də başlayacaq. /SPORTİNFO.AZ
