Livanın Səhiyyə Nazirliyi İsrailin atəşkəsə baxmayaraq, həyata keçirdiyi hücumlar nəticəsində həlak olanların sayının daha 21 nəfər artaraq 4 278-ə çatdığını açıqlayıb.
Nazirliyin yaydığı məlumata görə, İsrailin 2 mart tarixindən bəri Livana endirdiyi zərbələr nəticəsində ümumilikdə 4 278 nəfər həyatını itirib, 12 196 nəfər isə yaralanıb.
Qurumun bir gün əvvəl açıqladığı statistikada ölənlərin sayının 4 257 olduğu bildirilmişdi.
Hücumlar davam edir
İsrail bölgədə qüvvədə olan atəşkəsə və Livanın da daxil edildiyi bildirilən ABŞ–İran razılaşmasına baxmayaraq hücumlarını davam etdirir.
Livanın rəsmi NNA agentliyinin məlumatına görə, İsrail artilleriyası Nəbatiyyə vilayətinin Beyt Yahun yaşayış məntəqəsini atəşə tutub.
Bundan əlavə, İsrail ordusunun Bint Cübeyl rayonunun Ayta əl-Cəbəl və Beyt Yahun qəsəbələrində bir sıra evləri yandırdığı bildirilir.
Atəşkəs prosesi
İsrail ordusu 2 martda Livana genişmiqyaslı hava hücumlarına başlayaraq ölkənin cənubundakı bir sıra yaşayış məntəqələrini işğal etmişdi.
Livan hökuməti hücumlar səbəbindən ölkə daxilində məcburi köçkünlərin sayının 1 milyonu keçdiyini açıqlamışdı.
ABŞ prezidenti Donald Tramp 24 aprel tarixində Livan və İsrail arasında 17 apreldə qüvvəyə minmiş 10 günlük müvəqqəti atəşkəsin daha üç həftə uzadıldığını bildirmişdi.
ABŞ-ın vasitəçiliyi ilə 14–15 may tarixlərində keçirilən danışıqların üçüncü raundunda isə tərəflər 17 maydan etibarən atəşkəsin daha 45 gün uzadılması barədə razılığa gəlmişdilər.
Bundan əlavə, İran və ABŞ Pakistanın vasitəçiliyi ilə aparılan danışıqlar nəticəsində 14 iyunda müharibənin dayandırılması və problemlərin diplomatik yolla həllini nəzərdə tutan 14 maddəlik razılaşma əldə etdiklərini açıqlamışdılar. Həmin razılaşma Livanda da döyüş əməliyyatlarının dayandırılmasını əhatə edir.
Vaşinqtonda İsrail və Livan nümayəndələri arasında keçirilən birbaşa danışıqların beşinci raundundan sonra isə iyunun 26-da tərəflər arasında çərçivə sazişi imzalanıb.
Könül
Musavat.com
