Almaniyanın müdafiə naziri Boris Pistorius alman zabitlərinin Krım körpüsünə hücumu müzakirə etdikləri söhbətin, güman ki, Sinqapurda baş verdiyini açıqlayıb.
Musavat.com xarici mediaya istinadla xəbər verir ki, nazir həmçinin bildirib ki, sızmaya səbəb zabitlərdən birinin adi telefondan gələn zəng vasitəsilə təhlükəsiz Webex platformasında hərbçilərin qrup zənginə qoşulmağa çalışarkən qorunmayan rabitə xəttindən istifadə etməsi olub. "Biz güman edirik ki, ruslar genişmiqyaslı müşahidədən istifadə edərək, təsadüfən söhbət iştirakçısının zənginə qulaq asıblar", - Almaniya Müdafiə Nazirliyinin rəhbəri bildirib.
Eyni zamanda, o, “rus casusu”nun bu qrup zəngi ilə birbaşa əlaqəli olması ehtimalını istisna edib. Pistorius bildirib ki, sızıntı bir zabitin şəxsi səhvi olub və onun barəsində intizam tədbirləri görülür.
Martın 1-də məlum olub ki, alman zabitlərinin Krım körpüsünün bombalanmasını müzakirə etdiyi səs yazısı yayılıb. Lakin səs yazısının özü dərc olunmayıb.
Sonradan Almaniya söhbətin həqiqiliyini təsdiqləyib. Almaniya kansleri Olaf Şolts söhbətin səs yazısının dərci ilə bağlı hərtərəfli araşdırma aparacağına söz verib.
Musavat.com
