Moskva vilayətətində məhkəmə Abxaziya qəhrəmanı və Baş Qərargah Baş İdarəsinin keçmiş polkovniki Gennadi Korotenkonu sifarişli adam öldürmə ittihamı ilə məhkum edib. Cinayətkar ciddi rejimli koloniyada 16 il həbsdə yatacaq.
Musavat.com “Kommersant” qəzetinə istinadla verdiyi xəbərə görə, məhkəmə müəyyən edib ki, Korotenko muzdlu cinayətkar kimi 2014-cü ildə neft-qaz sənayesi üçün reagentlər istehsalçısı "Sintez" səhmdar cəmiyyətinin ortaq sahibi Nikolay Martınovu öldürüb.
Eyni zamanda qətlə yetirilən şəxsin biznes ortağı Anton Yeroxinin sifarişli qətlin təşkilatçısı olduğu üzə çıxıb.
Qəzetin yazdığına görə, Martınovun qatilinin şəxsiyyəti cinayət yerindən tapılan toxumların qabıqları sayəsində müəyyən edilib. Kriminoloqlar Korotenkonun DNT-sini tapıblar.
Məhkəmənin hökmü ilə Anton Yeroxin 15 il, Gennadi Korotenko isə 16 il müddətinə azadlıqdan məhrum edilib.
Qəzet qeyd edir ki, cinayəti törədən şəxs daha qısa cəza ala bilərdi, lakin onda “İqla” portativ zenit-raket kompleksi (MANPADS) və bir neçə pulemyot da daxil olmaqla, böyük silah ehtiyatı aşkar edilib.
Musavat.com
