İran İslam Respublikasının Xarici İşlər Nazirliyi iyunun 30-da Qətərin paytaxtı Dohada Amerika Birləşmiş Ştatlarının nümayəndələri ilə kritik məsləhətləşmələrin keçiriləcəyinə dair beynəlxalq mediada yayılan xəbərləri rəsmi şəkildə növbəti dəfə təkzib edib.
Musavat.com xəbər verir ki, İranın xarici siyasət idarəsinin yaydığı rəsmi bəyanatda tərəflər arasında hər hansı bir texniki danışıqlar formatının hələlik təsdiq olunmadığı bildirilib.
Nazirlik bəyan edib ki, İran və ABŞ tərəfləri gərginliyin nizamlanmasına yönəlmiş texniki danışıqların nə vaxt və konkret olaraq hansı məkanda keçiriləcəyi barədə hələlik yekun bir ortaq razılığa və razılaşmaya gəlməyiblər. Rəsmi Tehran bu cür məlumatların vaxtından əvvəl və reallığı tam əks etdirməyən iddialar olduğunu vurğulayaraq, prosesin yalnız qarşılıqlı şərtlər çərçivəsində tənzimlənə biləcəyini diqqətə çatdırıb.
Siyasi ekspertlər bu bəyanatı iki ölkə arasında Hörmüz boğazı və regional təhlükəsizlik məsələlərində danışıqlar masasının qurulmasının hələ də ciddi diplomatik maneələrlə üzləşdiyinin bariz göstəricisi kimi qiymətləndirirlər.
Musavat.com
