İran mübadilə sazişi çərçivəsində istifadəsinə icazə verilən 6 milyard dolları yalnız ərzaq, dərman, tibbi cihaz və kənd təsərrüfatı məhsullarının alınmasına xərcləyə biləcək.
Musavat.com TASS-a istinadən xəbər verir ki, bu barədə Vaşinqton administrasiyasının yüksək səviyyəli nümayəndəsi xüsusi telefon brifinqində jurnalistlərə bildirib.
“Məhbus mübadiləsinin bir hissəsi olaraq, biz həmçinin əvvəllər Cənubi Koreyada hesabda dondurulan 6 milyard dollarlıq İran vəsaitini Qətərdəki məhdud hesaba köçürürük və burada onlar humanitar əməliyyatların çox məhdud kateqoriyası üçün əlçatan olacaq. Söhbət yalnız ərzaq, dərmanlar, tibbi cihazlar və kənd təsərrüfatı məhsullarından gedir”, - deyə ABŞ rəsmisi vurğulayıb.
Onun sözlərinə görə, eyni zamanda, bu cür məhsulların tədarükçülərinin sayı ciddi şəkildə məhdudlaşdırılacaq, onlar “Qətərdəki humanitar kanal” vasitəsilə İrana çatdırılacaq. Söhbət nə ABŞ-ın “vergi ödəyicilərinin vəsaitlərinin” Tehrana köçürülməsindən, nə də “hər hansı bir ödənişdən” gedir. ABŞ Xəzinədarlığı satınalma və çatdırılma prosesini yaxından izləyəcək: “Vəsaitlərin özü İrana axmayacaq. İran bu vəsaitləri yönləndirməyə və ya icazə verilən humanitar məqsədlərdən başqa hər hansı bir məqsədlə istifadə etməyə cəhd etsə, ABŞ bu vəsaitləri bloklamaq üçün hərəkətə keçəcək”.
Avqustun 10-da “The New York Times” qəzeti yazıb ki, ABŞ və İran məhbusların mübadiləsi barədə razılığa gəliblər. Həmin gün Ağ Ev razılaşmanı təsdiqlədi, lakin nəhayət sazişin başa çatdığını elan etmək üçün vətəndaşlarının İslam Respublikasından qayıtmasını gözləməyə çağırdı. İranın BMT-dəki daimi nümayəndəliyi bildirib ki, Tehran və Vaşinqton məhbusları 5+5 formatında mübadilə etmək barədə razılığa gəliblər. Razılaşmanın bir hissəsi olaraq, İslam Respublikası sanksiyalara görə Cənubi Koreya banklarının hesablarında dondurulmuş 6 milyard dollara çıxış əldə edəcək.
Nüvə sazişindən çıxdıqdan sonra ABŞ Tehrana qarşı sanksiyalar tətbiq edərək, İran neftinin ən böyük idxalçılarından səkkizinin, o cümlədən Cənubi Koreyanın İslam Respublikasından enerji resursları almasına qadağa qoyub. Daha sonra İran rəsmiləri bəyan ediblər ki, Seul ABŞ Maliyyə Nazirliyinin tələbi ilə Tehranın son bir neçə ildə neft tədarükü üçün alacağı təqribən 7 milyard dolları dondurub. Cənubi Koreya neftə görə ödəmək üçün öz banklarına vəsait qoyub, lakin ABŞ-ın sanksiyalar rejiminə görə İrana köçürə bilməyib.
Musavat.com
