Beyləqan rayonundakı mağazaların birindən alınmış çörəyin içindən yara bandı çıxıb.
Bu barədə sosial şəbəkədə paylaşım edilib. Sosial şəbəkələrdə yayılan videoda şikayətçi bunları qeyd edib:
“Neçənci dəfədir, çörək aldığımız zaman içindən yad cisimlər çıxır – saç, tük, kağız və.s. İndi də yara bandı çıxıb. Bu iyrəncliyə son verilsin”.
Musavat.com xəbər verir ki, məsələ ilə bağlı Sfera.az-a açıqlama verən qida məsələləri üzrə mütəxəssis Ağa Salamov deyib ki, sözügedən çörəkdə fiziki çirklənmə baş verib:
“Fiziki çirklənmə halları çox vaxt təlimsiz və məsuliyyətsiz işçi heyəti tərəfindən reallaşır. Təlimsiz olan işçi heyəti qidaları fiziki, kimyəvi və bioloji çirklənməyə məruz qoya bilir. Maraqlıdır ki, 21-ci əsrdə Azərbaycanda istehsalatda çalışanlar faydalı təlimlərdən kənarda qalırlar. Çünki sahibkarlar çox maliyyə sərf etmədən ancaq öz ciblərini doldurmaq istəyirlər”.
Müsahibimiz bildirib ki, belə hallarda qida zəhərlənmələri qaçılmaz olur: “Burada risk qrupuna xüsusilə uşaqlar, hamilələr və yaşlılar daxildir”.
