Dünya Çempionatı 2026-nın pley-off mərhələsinin ikinci günüdür. Artıq ilk 1/8 finalçı kimi ev sahiblərindən Kanadanın adı məlumdur. Bu gün axşam və səhər saatlarına doğru daha üç ölkə adını üst tura yazdıracaq. Turnirin bu mərhələsində səhvə heç bir yer yoxdur. Məğlub olan komanda mundialla vidalaşacaq. Qalib isə hədəfinə doğru daha bir addım atmış olacaq.
Günün diqqət mərkəzində olan qarşılaşmalarından biri saat 21:00-da beşqat dünya çempionu Braziliya ilə Asiyanın ən güclü komandalarından sayılan Yaponiya arasında baş tutacaq.
Braziliya qrup mərhələsini inamlı oyunla başa vuraraq lider kimi pley-offa yüksəlib və çempionluğun əsas favoritlərindən biri hesab olunur. Baş məşqçi Karlo Ançelotti komandasını həm taktiki, həm də psixoloji baxımdan yüksək səviyyədə hazırlayıb və futbolçularından maksimum diqqətli olmağı tələb edib.
Yaponiya isə son illərdə dünya futbolunda sabit inkişaf edən komandalardan biridir. Sürətli keçidlər, intizamlı müdafiə və kollektiv oyun yaponların əsas üstünlükləridir. Asiya təmsilçisi favorit olmasa da, Braziliyanın işini çətinləşdirəcək potensiala malikdir. Pley-off mərhələsində bir səhv belə oyunun taleyini dəyişə bilər və bu səbəbdən ehtiyatlı başlanğıc gözlənilir.
Eyni zamanda xüsusi olaraq vurğulayaq ki, Braziliya dünya çempionatı tarixinin ən titullu komandasıdır və hər pley-off matçına çempionluq hədəfi ilə çıxır.
Yaponiya isə son illərdə Avropa futbolunda çıxış edən futbolçularının sayını artırıb və artıq “sensasiyaların müəllifi” kimi tanınır. Braziliyanın topa sahib olmağa üstünlük verəcəyi, Yaponiyanın isə sürətli əks-hücumlara bel bağlayacağı gözlənilir.
Qarşılaşmanın taleyini Vinisius Junior, Rodriqo və ya Endrik kimi fərdi ustalığı yüksək futbolçular həll edə bilər. Yaponiya tərəfində isə Kubo və Mitoma əsas təhlükə mənbələridir.
Gecənin ikinci görüşündə dördqat dünya çempionu Almaniya saat 00:30-da Paraqvayla üz-üzə gələcək.
Almanlar qrup mərhələsində ümumilikdə inamlı təsir bağışlayaraq turnirin favoritləri sırasında olduqlarını nümayiş etdiriblər. Xüsusilə Camal Musiala və Florian Virts kimi yaradıcı futbolçular komandanın hücum xəttinin əsas gücü hesab olunur.
Paraqvay isə pley-offa əzmkar mübarizə hesabına yüksəlib. Cənubi Amerika təmsilçisi fiziki futbolu, sıx müdafiəsi və əks-hücumları ilə seçilir. Almaniya kağız üzərində favorit sayılsa da, Paraqvayın intizamlı oyunu görüşün gərgin keçəcəyini göstərir.
Almaniya pley-off mərhələlərində böyük təcrübəyə malik komandadır və turnirlərdə adətən bu mərhələdən sonra daha güclü çıxış edir.
Paraqvay isə uzun illərdən sonra yenidən dünya çempionatının həlledici mərhələsində çıxış edir və psixoloji baxımdan itirəcəyi az olan komandadır.
Almaniya erkən qol vurarsa, oyuna tam nəzarət edə bilər. Əks halda Paraqvayın sərt müdafiəsi matçı əlavə vaxta qədər uzada bilər.
Günün son qarşılaşması Niderland-Mərakeş (saat 05:00) oyunudur.
Bu, bəlkə də ən maraqlı duel hesab olunur. Bir tərəfdə dünya çempionatının üçqat finalçısı Hollandiya, digər tərəfdə isə son dünya üçünçüsü Mərakeş dayanıb.
Niderland texniki futbolu, topa nəzarəti və sürətli hücumları ilə seçilən komandadır. Avropa təmsilçisi qrup mərhələsində sabit çıxışı ilə növbəti mərhələyə vəsiqə qazanıb və titul uğrunda mübarizəni davam etdirmək niyyətindədir.
Mərakeş isə son illərdə dünya futbolunun ən sürətlə inkişaf edən kollektivlərindən biridir. Afrika təmsilçisi müdafiədə intizamlı oyunu, sürətli cinah hücumları və yüksək döyüşkənliyi ilə istənilən rəqib üçün təhlükəli komandaya çevrilib.
Mərakeş bu mundialda da növbəti sensasiyanı reallaşdıraraq tarixi uğurunu davam etdirmək istəyir.
Bu görüş günün ən balanslı cütlüyüdür. Niderland gənclərlə təcrübəli futbolçuların uğurlu sintezini qurub. Mərakeş isə son illərdə böyük turnirlərdə göstərdiyi nəticələrlə artıq sensasiya yox, ciddi rəqib statusu qazanıb. Oyunda cinah mübarizəsi və standart vəziyyətlər həlledici rol oynayacaq.
Pley-off mərhələsi artıq hər bir səhvin baha başa gəldiyi mərhələdir. Bu gün keçiriləcək üç qarşılaşmanın hər birində həm dünya futbolunun nəhəngləri, həm də sürpriz etməyə qadir komandalar meydana çıxacaq. Futbolsevərləri yüksək temp, taktiki mübarizə və son dəqiqələrə qədər davam edəcək gərgin oyunların gözlədiyi şübhə doğurmur. Pley-off mərhələsində artıq hesablar və əvvəlki nəticələr heç bir əhəmiyyət daşımır. Burada yalnız bir oyun taleyi müəyyənləşdirir. Bu səbəbdən komandalar daha ehtiyatlı çıxış etsələr də, matçın son dəqiqələrində risk etməyə məcbur qalırlar. Məhz buna görə dünya çempionatının pley-off qarşılaşmaları hər zaman dramatik sonluqları, gözlənilməz qəhrəmanları və unudulmaz anları ilə yadda qalır.
Cavanşir Abbaslı
Musavat.com
