Noyabrın 15-də ABŞ-nin Kaliforniya ştatının San-Fransisko şəhərində Asiya-Sakit Okean İqtisadi Əməkdaşlıq Təşkilatının (APEC) sammiti çərçivəsində ABŞ Prezidenti Cozef Bayden və Çin Sədri Si Cinpin iki ölkənin müdafiə qurumları arasında təmasların bərpa olunacağını elan etmək niyyətindədirlər.
“Report” xəbər verir ki, bu barədə “Axios” portalı öz mənbələrinə istinadən məlumat yayıb.
Bildirilib ki, Çinin xarici işlər naziri Van İ paytaxt Vaşinqtona son səfəri zamanı açıq şəkildə Pekinin iki ölkənin müdafiə nazirlikləri arasında rabitə kanallarını bərpa etməyə hazır olduğunu açıqlayıb.
Portal xatırladıb ki, Konqresin Nümayəndələr Palatasının keçmiş spikeri Nensi Pelosinin (Kaliforniya ştatından demokrat) Tayvana səfərinə etiraz olaraq 2022-ci ildə fəaliyyətini dayandırdığı bu kanalların işini bərpa etmək Ağ evin əsas prioritetlərindən biridir.
