ABŞ ordusunun katibi Den Driskoll və Baş Qərargah rəisi general Rendi Corc bu həftə elan olunmamış səfərlə Ukraynanı ziyarət edən Pentaqonun indiyədək ən yüksək rütbəli rəsmiləri olublar.
Musavat.com xarici agentliklərə istinadən xəbər verir ki, bu barədə Politico məlumat yayıb.
Səfərin məqsədi Ukrayna rəhbərliyinin diqqətini Rusiya ilə dalana dirənmiş sülh prosesinə yönəltməkdir.
Nəşrin qeyd etdiyinə görə, ABŞ və Ukrayna həmçinin pilotsuz uçuş aparatlarının və avtonom döyüş sursatlarının istehsalı üzrə texnologiyaların mübadiləsini nəzərdə tutan böyük bir saziş üzərində işləyirlər və bu səfər qismən həmin təşəbbüsə dəstək verməyə hesablanıb.
Ukrayna həm uzun, həm də qısa mənzilli döyüş dronlarının hazırlanması və təkmilləşdirilməsi sahəsində liderə çevrilib; bu dronlar döyüş meydanının mənzərəsini dəyişdirib və Rusiyanın dərinliyindəki hədəfləri vurmağa imkan verib. Səfər barədə məlumatı planlaşdırma prosesinə bələd olan, lakin milli təhlükəsizlik məsələlərinin həssaslığına görə adının açıqlanmasını istəməyən iki şəxs verib.
Saytın yazdığına görə, ilk baxışdan Driskollun həssas sülhyaratma missiyası ilə Kiyevə göndərilməsi qəribə görünə bilər. Lakin orduda xidmət keçmiş, həmçinin vitse-prezident C.D. Vensin Yale Hüquq Məktəbindən dostu olan Driskoll bu gün Pentaqonda mühüm fiqura çevrilib və yaxın vaxtlarda daha yüksək və diqqət çəkən bir vəzifəyə gətirilə bilər.
Musavat.com
