ABŞ-da 2023-cü ilin oktyabr ayında istehlak qiymətləri (CPI) illik müqayisədə 3,2 faiz artıb.
Musavat.com ölkənin Əmək Nazirliyinin məlumatına istinadən xəbər verir ki, bu, 3,7 faizlik inflyasiya qeydə alınan sentyabrla müqayisədə 0,5 faiz bəndi azalma deməkdir.
“Trading Economics” analitiklərinin konsensus proqnozu ABŞ-da inflyasiyanın 3.3 faizə qədər zəifləyəcəyini nəzərdə tuturdu.
Enerji qiymətləri ötən ay illik ifadədə 4,5 faiz azalıb (sentyabrda 0,5 faiz azalmadan sonra). Ərzaq məhsullarının qiymətləri 3,3 faiz (sentyabrda +3,7 faiz), yeni avtomobillərin qiyməti 1,9 faiz (+2,5 faiz) artıb. Nəqliyyat xidmətləri 9,2 faiz (+9,1 faiz) bahalaşıb.
Oktyabr ayında CPI indeksi əvvəlki ayla müqayisədə dəyişməyib. Ekspertlər orta hesabla 0,1 faiz artım proqnozlaşdırırdılar. Göstərici 2022-ci ilin iyul ayından bəri ilk dəfə artmayıb.
Ərzaq və enerji xərcləri istisna olmaqla istehlak qiymətləri (Əsas CPI indeksi) iki il ərzində minimum səviyyədə illik 4 faiz və aylıq 0,2 faiz artıb. Konsensus proqnoz müvafiq olaraq 4,1 faiz və 0,3 faiz artım idi. Sentyabrda göstərici il ərzində 4,1 faiz, ay ərzində isə 0,3 faiz artıb.
Federal Ehtiyatlar Sistemi (FED) ölkədə istehlak qiymətlərinin artım tempi ilə bağlı məlumatları diqqətlə izləyir ki, bu da pul siyasəti ilə bağlı qərarların qəbulunda mühüm amillərdən biridir. FED-in hədəf inflyasiya səviyyəsi 2 faizdir. FED rəhbəri Cerom Pauell ötən həftə lazım gələrsə, inflyasiyanı bu hədəfə endirmək üçün uçot dərəcəsini artırmaqdan çəkinməyəcəklərini bəyan edib.
FED-in növbəti iclası dekabrın 12-13-də baş tutacaq.
Musavat.com
