Kəlbəcər rayonunun Başlıbel kəndində Ermənistan silahlı birləşmələri və terror qruplarının 1993-cü il 18 apreldə törətdiyi qətliamdan 29 il ötdü.
Aprelin 16-da Prezident Administrasiyasının tapşırığı əsasında Qaçqın və Məcburi Köçkünlərlə İş üzrə Dövlət Komitəsinin təşkilatçılığı ilə qətliamda şəhid olanların ailə üzvləri, hadisədən sağ çıxmış şəxslərin bəzilərinin, həmçinin jurnalistlərin Kəlbəcərin Başlıbel kəndinə səfəri təşkil olunub.
Səfərdə “Yeni Müsavat” qəzetinin yazarı, Başlıbel kəndindən olan Etibar Seyidağa da iştirak edib.
29 il 15 gün sonra doğma kəndinə gedən Etibar Seyidağa doğulduğu, 16 yaşına qədər yaşadığı ata evinin qarşısına çatarkən çox duyğulu anlar yaşanıb. Əməkdaşımız Başlıbel kəndinin ermənilər tərəfindən darmadağın ediləmiş qədim Məscidinin qalıqlarını, kəndin vandalizmə məruz qalmış qəbiristanlığını da ziyarət edib və reportaj hazırlayıb. Bu görüntülərdə erməni vandalizminin miqyası və azərbaycanlıların doğulduğu torpağına, yurduna bağlılığı, yurd həsrətinin necə ağır olduğu bir daha gözlər önündə canlanır.
Musavat.com
