Çox sayda məhsul və istehsalçıları beynəlxalq auditoriya ilə birləşdirən Türkiyənin aparıcı e-ticarət platforması “Trendyol” Ukrayna bazarına daxil olmağı planlaşdırır.
Musavat.com xəbər verir ki, bu addım “Trendyol”un Almaniya, Azərbaycan, Körfəz ölkələri və Mərkəzi və Şərqi Avropa bazarlarına uğurlu çıxışının davamıdır.
“Trendyol Qrupu”nun prezidenti Çağlayan Çətin bu həftə Ukrayna baş nazirinin birinci müavini və iqtisadiyyat naziri Yuliya Sviridenko, Ukraynanın strateji sənaye naziri Aleksandr Kamışin və Türkiyənin aparıcı texnologiya şirkəti “Baykar”ın baş direktoru Haluk Bayraktarla birlikdə hər iki şirkətin beynəlxalq investisiya planlama strategiyasının bir hissəsi olaraq Ukraynada keçirilən bir sıra görüşlərdə iştirak edib.
Ukrayna Baş nazirinin birinci müavini və iqtisadiyyat naziri Yuliya Sviridenko “Trendyol Qrupu”nun prezidenti Çağlayan Çətin və “Baykar”ın baş direktoru Haluk Bayraktar ilə görüşdən məmnun olduğunu bildirib:
“Türk şirkətlərinin indi, müharibənin bitməsini gözləmədən Ukraynaya sərmayə yatırmağa hazır olması vacibdir. Onların marağı müharibə zamanı sürətlə inkişaf edən yüksək texnologiya sektorundan və müdafiə sənayesindən kənara çıxır. Eyni zamanda ixrac yönümlü logistika və bazar sahəsində əməkdaşlığa böyük maraq var. Biz əməkdaşlığımızı genişləndirmək və daha güclü iqtisadi əlaqələr qurmaq yollarını araşdırdıq. İnanıram ki, artan ticarət əlaqələri ölkələrimizi bir-birinə yaxınlaşdıra bilər”.
“Trendyol”un kəsintisiz və rahat e-ticarət təcrübəsini təmin etmək və transsərhəd ticarət vasitəsilə iqtisadi artımı təşviq etmək öhdəliyi şirkəti beynəlxalq e-ticarətin davam edən təkamülündə əsas oyunçu kimi mövqeləndirir.
“Trendyol” özünün dünya səviyyəli rəqəmsal infrastrukturu və artan beynəlxalq genişlənməsindən istifadə etməklə sürətlə inkişaf edən e-ticarət bazarına malik, türk məhsullarına tələbatın böyük olduğu və daxili və beynəlxalq bazarları bu ölkənin markalarına açmaq imkanı olan Ukraynada yüksək potensial görür.
Yeni bazarlara çıxarkən “Trendyol” istehlakçılarla istehsalçıları əlaqələndirmək, 3 milyon vahid ehtiyat tutumu ilə mühüm regional rol oynayan Polşadakı anbarı kimi rəqəmsal və logistika infrastrukturuna sərmayə yatırmaq missiyasına sadiq qalır.
Qeyd edək ki, bu həftənin əvvəlinə Türkiyə və Ukraynanın nəqliyyat nazirləri İstanbulda bir araya gələrək, türk şirkətlərinə Ukraynada müharibə nəticəsində zədələnmiş infrastrukturun bərpasında iştirak etmək imkanı verən “Türkiyə-Ukrayna yenidənqurma işçi qrupu” yaratmaq haqqında saziş imzalayıblar.
2010-cu ildə yaradılan “Trendyol” Türkiyənin aparıcı e-ticarət platforması və dünyanın ən yaxşı e-ticarət platformalarından biridir.
Türkiyənin ilk dekakornu olan “Trendyol” Türkiyənin qabaqcıl araşdırma və inkişaf mərkəzlərindən biri “Trendyol Tech”, Türkiyənin ən sürətlə inkişaf edən logistika şəbəkəsi “Trendyol Express”, ani ərzaq və yemək çatdırılması xidməti “Trendyol Go” və Türkiyənin ən böyük ikinci əl mal platforması “Dolap” ilə birlikdə dəyər yaratmağa davam edir.
“Trendyol” həmçinin trendyol.com/en vasitəsilə Azərbaycan, Almaniya, Bolqarıstan, Polşa, Çexiya, Slovakiya, Macarıstan, Rumıniya, Yunanıstan, BƏƏ, Səudiyyə Ərəbistanı, Qətər, Küveyt, Bəhreyn və Oman və 27 Avropa ölkəsində və topdansatış tərəfdaş platformaları vasitəsilə 100-dən çox ölkə müştərilərlə əlaqə yaradır. “Trendyol” həmçinin yerli istehsalçılara 100-dən çox ölkəyə elektron ixracat imkanı verir.
Musavat.com
