ABŞ-nin Luiziana ştatında keçiriləcək Senat seçkiləri ərəfəsində Respublikaçılar Partiyası daxilində siyasi mübarizə yaşanır.
Musavat.com xəbər verir ki, bu barədə "Politico" məlumat yayıb.
Nəşrin yazdığına görə, Luiziananın xəzinədarı, Konqresin keçmiş üzvü Con Fleminq prezident Donald Trampın dəstəklədiyi namizəd Culiya Letlouya qarşı gözlənilməz müqavimət göstərir.
Məlumata əsasən, Letlou həm Trampın, həm də Luiziana qubernatoru Ceff Lendrinin dəstəyini alsa da, son sorğular Fleminqin seçkidə qalib gəlmək şansının artdığını göstərir.
Fleminq özünü Tramp hərəkatının (MAGA) dəyərlərinə daha sadiq siyasətçi hesab etdiyini bildirir. Onun seçki şüarlarından biri də "MAGA məşhur olmamışdan əvvəl də mən MAGA idim" ifadəsidir.
Con Fleminqin mümkün qələbəsi son həftələrdə Trampın dəstəklədiyi bəzi namizədlərin seçkilərdə uğursuz çıxış etməsindən sonra prezidentin siyasi dəstəyinin əvvəlki qədər həlledici olmaya biləcəyini göstərən növbəti nümunə ola bilər.
74 yaşlı Fleminq seçki kampaniyasını əsasən şəxsi vəsaiti hesabına maliyyələşdirib və indiyədək buna 11 milyon dollar xərcləyib. Onun güclü yerli dəstəyə malik olduğu, minlərlə təşviqat lövhəsi yerləşdirdiyi və yüzlərlə könüllünü səfərbər etdiyi bildirilir.
Məqalədə qeyd olunur ki, seçkinin taleyini aşağı seçici fəallığı həll edə bilər.
Analitiklər hesab edirlər ki, belə şəraitdə daha motivasiyalı və mühafizəkar elektorata malik namizəd üstünlük qazana bilər. Fleminq də məhz buna ümid etdiyini bildirərək, Tramp tərəfdarlarının hər zaman prezidentin tövsiyəsinə deyil, öz seçimlərinə üstünlük verə bildiklərini vurğulayıb.
Musavat.com
