ABŞ-ın keçmiş prezidenti Donald Tramp noyabrda keçiriləcək prezident seçkilərində qalib gələrsə, Çindən idxal olunan mallara 60 faiz rüsum tətbiq edə bilər. Bu barədə mənbələrə istinadən The Washington Post (WP) məlumat yayıb.
Nəşrin yazdığına görə, Tramp “qlobal ticarət müharibəsinə” səbəb ola biləcək “Çinə yeni genişmiqyaslı iqtisadi hücum” variantlarını nəzərdən keçirir. Beləliklə, WP-nin istinad etdiyi analitiklərin hesablamalarına görə, Respublikaçı namizəd Çinin ABŞ-la münasibətlərdə ticarət statusunu aşağı sala bilər ki, bu da rüsumların 40 faizə qədər artmasına səbəb olacaq.
Qəzet yazır ki, şəxsi söhbətlərində Tramp müşavirləri ilə bütün Çin idxalına 60 faiz rüsum tətbiq etmək imkanını müzakirə edir. Qəzet təxmin edir ki, “bu variantlardan hər hansı biri ABŞ və qlobal iqtisadiyyatlar üçün böyük xərclərlə nəticələnəcək ki, bu da Trampın prezident kimi ilk dövründəki ticarət müharibəsinin təsirindən qat-qat artıq olacaq”. WP qeyd edir ki, Trampın nümayəndələri ona daxil olan məlumatla bağlı şərh tələblərinə cavab verməyiblər.
Qeyd edək ki, Tramp əvvəlki prezidentliyi dövründə Pekinə qarşı ticarət müharibəsi başlatdı və Çindən gələn mallara 370 milyard dollarlıq rüsum tətbiq etdi.Çin hakimiyyətinin fikrincə, bu, təkcə Çin şirkətlərinə deyil, həm də Amerika istehlakçılarına mənfi təsir göstərib.
15 yanvar 2020-ci ildə tərəflər Vaşinqtonda ticarət sazişinin birinci mərhələsi barədə razılığa gəliblər. Çin sazişin birinci və ikinci illərində ABŞ məhsullarının alışını müvafiq olaraq 76,7 milyard dollar və 123,3 milyard dollar artırmağa razılaşıb. ABŞ-ın Tramp dövründə Çindən gətirilən mallara tətbiq etdiyi artan rüsumlar qaldırılmayıb.
Bu ilin noyabrında ABŞ-da növbəti prezident seçkiləri keçiriləcək. Hazırkı president Co Bayden və D.Tramp seçkilərə yenidən qatılacaqlarını bəyan ediblər.
Musavat.com
