Ötən il TikTok şəbəkəsi ABŞ-da 16 milyard dollar gəlir əldə edib.
Musavat.com xəbər verir ki, bu barədə “Financial Times” şirkətin maliyyə göstəriciləri ilə tanış olan üç mənbəyə istinadən məlumat yayıb.
Mənbələr bildirib ki, xidmətin sahibi olan “ByteDance”in ümumi gəliri il ərzində təxminən 40 faiz artımla 120 milyard dollar təşkil edib. Şirkət gəlirinin böyük hissəsini Çində əldə edir. Mənbələrə görə, xalis gəlir 28 milyard dollar qiymətləndirilir.
Dünyanın ən böyük sosial şəbəkəsi olan “Meta”nın gəliri 2023-cü ildə 16 faiz artaraq 135 milyard dollara çatıb.
Səhmləri birjada ticarət olunmayan “ByteDance” maliyyə rəqəmlərini açıqlamır. Şirkət nümayəndələri şərh verməkdən imtina ediblər.
Xəbər verdiyimiz kimi, ABŞ Konqresinin Nümayəndələr Palatası TikTok-un Amerika ərazisində qadağan edilməsinə səbəb ola biləcək qanun layihəsini təsdiqləyib. Sənəd “ByteDance”in TikTokdan imtina etməsini nəzərdə tutur; əks halda, platforma ABŞ-da qadağan edilə bilər.
Qanun layihəsi hazırda Senatda nəzərdən keçirilir, onun qəbulu perspektivləri tam aydın deyil. Eyni zamanda ABŞ prezidenti Co Bayden artıq senatorlar tərəfindən təsdiqlənəcəyi təqdirdə sənədi imzalayacağını bəyan edib.
Bir gün əvvəl ABŞ-ın keçmiş maliyyə naziri Stiven Mnuçin demişdi ki, o, xidməti almaq üçün investorlar qrupu formalaşdırmağa başlayıb.
FT qeyd edir ki, TikTok-un Amerika bölməsi, Meta biznesi ilə eyni səviyyədə tətbiq edilərsə, təxminən 150 milyard dollar dəyərində ola bilər. Bundan əlavə, sövdələşmə Çin hakimiyyəti tərəfindən qadağan edilə bilər.
TikTok son bir neçə ildə böyük populyarlıq qazanıb. Amerika hakimiyyət orqanlarının məlumatına görə, Çin hakimiyyəti bu proqramdan amerikalıların şəxsi məlumatlarını toplamaq üçün istifadə edə bilər. Şirkətin hesablamalarına görə, TikTok-un ABŞ-da təxminən 170 milyon istifadəçisi var.
Musavat.com
