"Biz güman edirik ki, separatçılar qanunsuz silahlı birləşmələrini ləğv edib silahlarını təhvil verəndən sonra, həmçinin Ermənistan ordusunun qalıqları ölkəmizi tərk edəndən sonra, bu, Ermənistanla Azərbaycan arasında səmərəli dialoqa öz müsbət təsirini göstərəcək və həmçinin, sülh müqaviləsinin razılaşdırılması və imzalanması üçün də münbit şərait yaradacaq. Bilirsiniz ki, bir ilə yaxındır ki, bu müzakirələr davam edir".
Musavat.com xəbər verir ki, bunu Azərbaycan Prezidentinin xüsusi tapşırıqlar üzrə nümayəndəsi Elçin Əmirbəyov Fransanın İ24 telekanalına müsahibəsində deyib.
Sözügedən müsahibəni təqdim edirik.
Aparıcı: Bakıya bağlanırıq. Müsahibimiz Azərbaycan Prezidenti İlham Əliyevin xüsusi tapşırıqlar üzrə nümayəndəsi Elçin Əmirbəyovdur. Biz onunla son atəşkəs razılaşması haqqında danışacağıq. Axşamınız xeyir, Elçin Əmirbəyov, sizə təşəkkür edirəm. Siz fransızca danışacaqsınız?
Elçin Əmirbəyov: Bəli, dəvət üçün təşəkkür edirəm.
Aparıcı: Xahiş edirəm, mənə söyləyin, Azərbaycandakı əhval-ruhiyyə haqqında ilk öncə soruşmaq istəyirəm. Dağlıq Qarabağda separatçılara qarşı bu münaqişədə Azərbaycan özünün son sözünü dedimi?
Elçin Əmirbəyov: Əldə olunmuş razılaşmada deyildiyi kimi, separatçılar buraxılmalıdırlar. Bu anti-terror tədbirlərindən sonra Azərbaycan özünün bu ərazisi üzərindəki suverenliyini tam bərpa etdi. Həmçinin, məlumdur ki, beynəlxalq hüquqa əsasən, o cümlədən də, dünya ictimaiyyətin qəbul etdiyi kimi bu torpaqlar Azərbaycan ərazisidir. Hamı, o cümlədən də, Fransa bu faktı qəbul edir. Hesab edirəm ki, bu razılaşmanın vacib nəticələrindən biri də ondan ibarətdir ki, bu, Azərbaycanla Ermənistan arasında münasibətlərin həlli üçün də mühüm təsirə malik olacaq. Söhbət danışıqlar mövzusu olan sülh müqaviləsinin imzalanmasından gedir. Çünki qeyri-qanuni erməni hərbi kontingentin bizim ərazimizdə olması həm iki ölkə arasında danışıqlara, həm də sülh prosesinin davam etdirilməsinə ən ciddi maneə idi. Biz güman edirik ki, separatçılar qanunsuz silahlı birləşmələrini ləğv edib silahlarını təhvil verəndən sonra, həmçinin Ermənistan ordusunun qalıqları ölkəmizi tərk edəndən sonra, bu, Ermənistanla Azərbaycan arasında səmərəli dialoqa öz müsbət təsirini göstərəcək və həmçinin, sülh müqaviləsinin razılaşdırılması və imzalanması üçün də münbit şərait yaradacaq. Bilirsiniz ki, bir ilə yaxındır ki, bu müzakirələr davam edir.
Aparıcı: Əgər bu gün Azərbaycanın ərazi bütövlüyü bərpa olunubsa, Dağlıq Qarabağda yaşayan erməni sakinlər sülh və təhlükəsizlik şəraitində Azərbaycanın bu ərazisində yaşayacaqlarmı?
Elçin Əmirbəyov: Əlbəttə. Amma kiçik bir düzəliş etmək istəyirəm. “Dağlıq Qarabağ” mövcud deyil. Azərbaycan ərazisində yalnız Qarabağ regionu var. “Dağlıq Qarabağ” Sovet İttifaqı dönəmində süni yaradılmış bir anlayış idi. Bir də orada yaşayan sakinlərin sayı haqqında demək istəyirəm. Çünki bunda da yanlışlıq edilir. 120 000 rəqəmini işlədirlər. Halbuki, təxmini rəqəmlərə görə orada cəmi 50 000-ə yaxın erməni əsilli sakin yaşayır. Bu rəqəmə 10 000 silahlı birləşmə də daxildir ki, onlar da tərksilah olunub ərazimizi tərk etməlidirlər. Hesab edirəm ki, bu sülh üçün çox vacibdir. Həmin razılaşmaya da bu mənada əməl olunmalıdır. Azərbaycanın mərkəzi hakimiyyət orqanlarının təmsilçiləri ilə Qarabağdakı erməni sakinlərin nümayəndələri arasında keçirilən görüşdə Qarabağda yaşayan ermənilərin Azərbaycanın siyasi və iqtisadi məkanına reinteqrasiyası məsələləri müzakirə olunacaq. Qeyd edim ki, bizim tərəfimizdən bununla bağlı artıq müvafiq fikirlər və hətta tədbirlər planı hazırlanıb. Həmin təkliflər erməni icmasının nümayəndələrinə təqdim olunacaq. Buraya onların hüquqları və Azərbaycan vətəndaşları kimi əldə edəcəkləri haqqlar daxildir. Vacib olan odur ki, erməni nümayəndələr konstruktiv davransınlar. Təbii ki, bu da həm danışıqlara, həm də onun nəticə verməsinə müsbət təsir göstərə bilər.
Aparıcı: Cənab Əmirbəyov, sonuncu sualı vermək istəyirəm. Siz nikbinsinizmi? Çünki Azərbaycan bu axşam bəyan etdi ki, Ermənistanla uzun sürən gərginlikdən və müharibədən sonra münasibətlərini normallaşdırmağa hazırdır. Siz ermənillərin də münasibətləri normallaşdırmağa hazır olmaqlarına nikbin baxırsınızmı?
Elçin Əmirbəyov: Bəli. Peşəm diplomat olduğuna görə, bir qayda olaraq nikbin olmağa çalışmalıyam. Lakin bununla yanaşı hesab edirəm ki, ərazimizdə qanunsuz silahlı birləşmələrin mövcudluğu problem aradan qaldırılmalı idi. İndi bizim bütün ərazimizdə suverenliyimiz təmin olunub. Ona görə də Ermənistan Azərbaycanla müzakirələri, danışıqları bərpa etməlidir. Ermənistanla müzakirə aparan bizim heyətimizin üzvü kimi deməliyəm ki, sülh müqaviləsinin layihəsinin demək olar ki yarısı razılaşdırılıb və bu, hər iki tərəfin konstruktiv yanaşma yolu ilə edilib. İndi bizim dünyanın, xüsusilə də, hər iki xalqın – azərbaycanlıların və ermənilərin qəbul edəcəyi müsbət nəticəyə gəlmək üçün daha çox ümidimiz var. Hazırda onların yaxşı qonşular kimi, sülh, sabitlik və tərəqqi şəraitində həyatlarını davam etdirmək şansları yaranıb.
Aparıcı: Elçin Əmirbəyova təşəkkür edirəm. Xatırladım ki, o, Prezident İlham Əliyevin xüsusi tapşırıqlar üzrə nümayəndəsidir. Bakıdan bizə canlı yayımla qoşulduğunuz üçün sizə təşəkkür edirəm.
