Rusiya Ukraynanın “Starlink” xidmətinin işini getdikcə daha çox pozmağa başlayıb.
Musavat.com xəbər verir ki, bu barədə “The New York Times” qəzetinin hazırladığı materialda məlumat açıqlanıb.
Qəzet yazır ki, Rusiya Xarkov bölgəsinə irəliləməzdən əvvəl 92-ci Hava Hücum Briqadasının əsgərləri həyati bir resursu itiriblər - əsgərlərin ünsiyyət qurmaq, kəşfiyyat məlumat toplamaq və pilotsuz təyyarə hücumları həyata keçirmək üçün istifadə etdikləri “Starlink” peyk internet xidməti demək olar ki, tamamilə yararsız hala düşüb.
“Starlink” müharibənin ilk günlərindən Ukrayna ordusu üçün kritik rol oynayır. Terminallar normal işləmədikdə ordu operativ məlumatı tez bir zamanda əlaqələndirə və paylaşa bilmir. Xarkov istiqamətində Rusiyanın irəliləyə bilməsinin əsas səbəbi məhz Ukrayna qüvvələri arasında koordinasiyanın pozulması, dronlardan istifadənin çətinləşməsi olub.
Çünki Xarkov vilayətinə hücumdan əvvəl ruslar “Starlink” xidmətinin keyfiyyətini aşağı salmaq üçün güclü elektron silahlardan və daha mürəkkəb vasitələrdən istifadə ediblər:
"Bu hərəkətlər “Starlink”də kütləvi fasilələrə səbəb oldu. Əgər onlar (ruslar - red) uğur qazanmağa davam edərlərsə, bu, Ukraynanın imkanlarının məhdudlaşması və münaqişədə taktiki dəyişikliyə gətirib çıxara bilər. Çünki ABŞ və Digər hökumətlər “SpaceX” ilə əməkdaşlıq edir və uğursuzluqlar “Starlink”in texnoloji cəhətdən inkişaf etmiş bir rəqibə qarşı etibarlılığına dair daha geniş suallar doğurur”.
“Starlink” internet bağlantılarını Yer kürəsinin orbitində olan peyklərdən ötürür. Siqnallar yerdəki terminallar tərəfindən qəbul edilir və sonra əlaqəni Wi-Fi marşrutlaşdırıcısı kimi yaxınlıqdakı noutbuklara, telefonlara və digər cihazlara paylayır. “Starlink” 2022-ci ildən Ukraynaya həyati əhəmiyyət kəsb edən internet xidməti təqdim edir və əsgərlər, xüsusən də dronları idarə etmək üçün ondan istifadə edirlər.
Ukraynanın rəqəmsal texnologiyalar naziri Mixail Fedorov Rusiyanın “Starlink”ə son hücumlarının yeni və daha qabaqcıl texnologiyalardan istifadə ilə həyata keçirildiyini bildirib.
Əvvəllər xidmət müdaxilələrə, xüsusən də elektron müharibənin təsirinə son dərəcə yaxşı dözürdü: "Lakin ruslar indi “Starlink” əlaqələrinin keyfiyyətini pozmaq üçün müxtəlif mexanizmləri sınaqdan keçirirlər, çünki bu, bizim üçün çox vacibdir".
Onun sözlərinə görə, Ukrayna problemləri həll etmək üçün daim “SpaceX” ilə əlaqə saxlayıb. “SpaceX” şərh tələblərinə cavab verməyib.
Rusiyanın elektron müharibə səylərinə rəhbərlik edən bir məmur, keçən ay dövlət mediasına ordunun “Starlink”i “hədəf siyahısına” saldığını və xidməti zərərsizləşdirmək üçün imkanları inkişaf etdirdiyini söylədi.
Fedorov “Starlink” xidmətinin tezliklə yaxşılaşmalı olduğunu desə də, hərbçilər və rəsmilər bəzi kəsintilərin Rusiyanın hücumlarından qaynaqlandığını söyləyir. Onların fikrincə, döyüş meydanında kritik anlarda bu xidmətdə baş verən hər hansı problem Ukrayna ordusunu daha böyük uğursuzluğa düçar edir.
Keçmiş Pentaqonun rəsmisi və elektron müharibə eksperti Kari Bingen bildirib ki, “Starlink” və digər peyk rabitəsi yüksək güclü radiotezliklərdən istifadə edərək əlaqələri həddindən artıq yükləməklə pozula bilər. Onun sözlərinə görə, gizli hücumlar adətən böyük radio qülləsi olan avtomobildən həyata keçirilir.
Musavat.com
