Portuqaliya millisinin keçmiş üzvü, "Qızıl top"un sahibi Luiş Fiqu yığmanın baş məşqçisi Fernando Santuşun kapitan Kriştiano Ronaldonu DÇ-2022-nin 1/4 finalında Mərakeşlə matçda (0:1) start heyətində meydana buraxmamaq qərarına münasibət bildirib.
Qol.az xəbər verir ki, o, Santuşun yanlış qərar verdiyini bildirib. Fiqu deyib: “Ronaldo ehtiyat oyunçular skamyasında olarkən dünya çempionatını qazana bilməzsən. Onu heyətdən kənarda saxlamaq səhv idi. Bu məğlubiyyətin tam məsuliyyəti Santuşun üzərinə düşür”.
Xatırladaq ki, DÇ-2022-nin 1/4 finalında Portuqaliya millisi Mərakeşə 0:1 hesabı ilə uduzub. Ronaldo bu görüşdə Portuqaliya millisinin start heyətində yer almayıb və oyunun 51-ci dəqiqəsində meydana çıxsa da, qol vura bilməyib. Portuqaliya millisi isə turnirdə mübarizəni dayandırıb.
Daha əvvəl 1/8 finalda İsveçrə ilə matçda Ronaldo da ehtiyat oyunçular arasında idi.
