Milli Məclisin iclasında söz alan deputat Qüdrət Həsənquliyev Rusiyada baş verən vəziyyətə, “Vaqner”çilərin qiyamına diqqət çəkdi.
“Bu gün səhər öyrəndik ki, Priqojinin əsasən cinayətkarlardan ibarət olan silahlı dəstəsi qanuni hakimiyyətə qarşı qiyam qaldırıb, bizdə 1993-cü ildə Surət Hüseynovun qaldırdığı qiyam kimi...”-deyə, deputat bildirdi.
Musavat.com-un məlumatına görə deputat qeyd etdi ki, Rusiya bizim tərəfdaşımız, böyük qonşumuzdur:
“1993-cü ildə Rusiyanın sərgilədiyi mövqedən fərqli olaraq, biz qiyamı pisləməli, qanuni hökumətə öz dəstəyimizi ifadə etməliyik. Rusiyanın Ukraynaya hərbi müdaxiləsini pisləsək də, Rusiyada sabitlik Azərbaycanın dövlət maraqlarına cavab verir. Çünki həm də orda 2 milyon azərbaycanlı, türk xalqları, on milyonlarla müsəlman yaşayır. Çox istərdik ki, qanuni hökumət qardaş qanı axıtmadan, danışıqlar yolu ilə qanunsuz silahlı dəstələri, qiyamçıları tərksilah etsin”.
E.Paşasoy,
Musavat.com
