Xəbər verdiyimiz kimi, ABŞ Nümayəndələr Palatasının qanunvericiləri prezident Donald Trampa İrana zərbələri dayandırmaq üçün təzyiq göstərməyi hədəfləyən qətnaməni dəstəkləyiblər.
Musavat.com "The Hill" qəzetinə istinadən xəbər verir ki, Konqresin 215 üzvü qətnamənin lehinə, 208 üzvü isə əleyhinə səs verib. Dörd respublikaçı - Tomas Massi, Brayan Fitspatrik, Tom Barrett və Uorren Devidson - Demokratlara qoşularaq qətnaməni dəstəkləyiblər.
"The Hill" qeyd edir ki, bu səsvermə İranla münaqişə üzərində siyasi mübarizədə irəliyə doğru əhəmiyyətli bir addımdır.
"Bu, çox vacibdir. Biz Konqresin hər iki palatasının bu müharibəni qanunsuz elan etməsinə yaxınlaşırıq. Bu, monumentaldır. Onun (Trampın - red.) etdiyi şey getdikcə daha çox qəbuledilməz hala gəlir", - deyə Nümayəndələr Palatasının üzvü Cared Haffman nəşrə bildirib.
Dünən keçirilən səsvermə qanunvericilərin Trampın İranla bağlı səlahiyyətlərini məhdudlaşdırmağa dördüncü cəhdidir.
Qətnamə artıq Senatda müzakirəyə çıxarılacaq.
Musavat.com
