İtaliyanın Turin şəhərindəki Monumental Qəbiristanlığında diqqət çəkən məzarlardan biri də azərbaycanlı döyüşçü Vilayət Əbülfət oğlu Hüseynova (1916–1944) məxsusdur.
Musavat.com xəbər verir ki, Qazax rayonundan olan Vilayət Hüseynovun həyat yolu İkinci Dünya müharibəsinin faciəvi və eyni zamanda qəhrəmanlıq dolu səhifələrindən birini əks etdirir.
Arxiv məlumatlarına görə, o, sovet ordusunun tərkibində döyüşərkən alman qüvvələrinə əsir düşüb. Lakin əsirliklə barışmayaraq qaçmağa nail olub və daha sonra İtaliyada faşizmə qarşı mübarizə aparan partizan dəstələrinə qoşulub. Həmin dövrdə yüzlərlə azərbaycanlı kimi o da Avropada antifaşist müqavimət hərəkatının sıralarında yer alıb.
Vilayət Hüseynov İtaliyanın şimal bölgələrində partizan əməliyyatlarında iştirak edib. Faşist və nasist qüvvələrinə qarşı döyüşlər zamanı göstərdiyi igidlik yerli əhali tərəfindən də ehtiramla xatırlanır. O, 1944-cü ildə döyüşlərin birində həlak olub və İtaliya torpağında dəfn edilib.
Maraqlıdır ki, İkinci Dünya müharibəsi illərində İtaliya və Balkanlarda döyüşən azərbaycanlı partizanların sayı kifayət qədər çox olub. Onların arasında xüsusilə Azərbaycanın Milli Qəhrəmanı Mehdi Hüseynzadə seçilir. O da əsirlikdən qaçaraq partizanlara qoşulmuş, İtaliya və Sloveniya ərazilərində nasistlərə qarşı məşhur diversiya əməliyyatları həyata keçirmişdi.
Turin qəbiristanlığında uyuyan Vilayət Hüseynovun məzarı Azərbaycan xalqının faşizm üzərində qələbəyə verdiyi töhfənin canlı sübutlarından biridir.
Şahanə Rəhimli
Musavat.com
