İranda molla rejiminə qarşı keçirilən aksiyalar fonunda sosial problemlər də artmaqda davam edir.
Buna qarşı isə müxtəlif sahə üzrə çalışanlar aksiyalar keçirirlər.
Musavat.com xarici mediaya istinadən xəbər verir ki, Sistan və Bəlucistan əhalisi son bir neçə gündə havanın temperaturunun kəskin şəkildə aşağı düşməsi ilə eyni vaxtda vilayətin bir çox bölgələrində qaz balonlarının çatışmazlığı ilə bağlı bir çox problemlərlə üzləşib.
“Tejarat News" saytı İranda neft lampalarının qiymətinin 12 dəfə artdığını açıqlayan hesabatında bütün növ yeni və ənənəvi isitmə cihazlarının qiymətinin bahalaşdığını yazıb.
Dəştiari şəhərinin Bəhüklət ərazisindəki Qaynar Qapı kəndi düzgün idarəetmənin olmaması ucbatından insanların soyuq havada evlərində yemək bişirmək üçün qaz balonu almaqdan ötrü saatlarla gözləyən ərazilərdən biridir.
Sosial şəbəkələrdə video yayımlanıb, videoda bir vətəndaş tankerlərin sırasını göstərərək İran qazının Pakistana ixrac edildiyini deyib.
Əsəluye şəhərindəki Cənubi Pars qaz şirkətinin işçiləri haqlarının tapdalanmasına etiraz olaraq nümayiş keçiriblər.
Yanvarın 17-də çağırışı ilə bir neçə mərkəzdə, o cümlədən Qərbdə neft və qazın istismarında Xoş Dehluran yatağı, İlam neft emalı zavodu, Əhvazda Karun Neft və Qaz İstismar Şirkəti və Maron Neft və Qaz İstismar Şirkəti, Pars Neft və Qaz İstismar Şirkəti, Ağacari Neft və Qaz İstismar Şirkəti, Kontinental Plateau Şirkəti, Cənubi Pars Beşinci Neft Emalı Zavodu, Fəcr Cam Qaz Emalı Zavodu, Abadan Neft Emalı Zavodu, Mahşəhr Neft-Kimya və Siri bölgəsində etiraz aksiyaları keçirilib.
Həmkarların tələbləri belədir: 1. Neftçilərlə bağlı qanunun 10-cu maddəsinin düzgün icrası; 2. Qeyd olunan maddənin cədvəlinin təkmilləşdirilməsi; 3. Qanuna uyğun olaraq 10-cu maddənin yerinə yetirilməsində gecikmə səbəbindən on illik geri ödəniş; 4. Neft Nazirliyində keçmişdə olduğu kimi pensiyaya çıxana görə mükafatların ödənilməsi; 5. Neft sənayesinin pensiyaçılarının qayğısına qalmaq və neft sənayesi ağsaqqallarının bu hissəsinin güzəranının yaxşılaşdırılması; 6. İşçilərin ixtisaslarının vaxtında uyğunlaşdırılması və asanlaşdırılması; 7. Kadr vəzifələrinin təşkili; 8. Neft pensiya fondunun xaotik və narahatedici vəziyyətinin aradan qaldırılması və onun əsasnaməsinə dəyişikliklər edilməsi.
Bir neçə etirazçı ikinci neftayırma zavodunun toplanışında həbs olunsa da, bir saat sonra sərbəst buraxılıb.
Mahşəhr və Abadanda təhlükəsizlik qüvvələri bir neçə neft işçilərinə qarşı pis rəftar edib və fiziki qarşıdurmalar baş verib. “Fəcr Cam” Buşehr Qaz Emalı Şirkəti işçiləri tətil keçirib.
Əvvəlcədən dərc edilmiş çağırışa əsasən, “Pars” Neft və Qaz Şirkətinin rəsmi işçiləri Əsəluyedə yanvarın 27-si səhər saatlarından iş fəaliyyətlərini dayandıraraq tətilə başlayıb və etiraz aksiyası keçiriblər.
İlam Qaz Emalı Zavodunun rəsmi işçiləri tətil keçirib. Əhvaz neft rəsmilərinin tətili: “Söz bəsdir, süfrəmiz boşdur!"
Ağacəri Neft və Qaz İstismarı Müəssisəsində çalışan neft sənayesinin rəsmi işçiləri də etiraz aksiyasına başlayıblar.
Çeşməxoş Neft və Qaz Şirkətinin rəsmi işçiləri də etiraz aksiyası keçiriblər. İşçilər “Neft Nazirliyinin vəzifə və səlahiyyətləri haqqında” qanunun 10-cu maddəsinin icrasını, bu qanunla bağlı geri ödəmələrin ödənilməsini, əməkhaqqı həddinin və xüsusi fövqəladə ödənişin götürülməsini tələb ediblər. Həmçinin, maaşların artırılması, pensiyaya görə mükafatların ödənilməsi, rifah xidmətlərinin və sağlamlıq və müalicə vəziyyətinin yaxşılaşdırılması, neft fondunun nizamnaməsinin ləğvini istəyiblər.
İranın “Sirjan Steel2 şirkətinin işçiləri isə yanvarın 17-də iş fəaliyyətini dayandıraraq tətilə çıxıblar.
Musvat.com
