“İranın hərbi obyektlərinə endirilən zərbələr və bunun ardınca gələn kəskin siyasi bəyanatlar bölgədəki vəziyyəti çox həssas bir mərhələyə çatdırıb. Həm Trampın ittihamları, həm də qarşılıqlı hərbi fəallıq regionun artıq formalaşmış təhlükəsizlik tarazlığını sınağa çəkir”.
Bunu Musavat.com-a açıqlamasında siyasi şərhçi Tural İsmayılov bildirib.
Qeyd edib ki, bu hadisələrin dini liderin dəfni ilə bağlı çox həssas və mürəkkəb bir dövrə təsadüf etməsi daxili sabitliyin və qərarvermə mexanizmlərinin üzərində əlavə təzyiq yaradır:
“Belə bir ərəfədə hər hansı hərbi hərəkətlilik, təbii olaraq, gərginliyin daha geniş coğrafiyaya yayılması və uzunmüddətli bir münaqişəyə çevrilməsi ehtimalını gündəmə gətirir.
Bu kimi hadisələrdə gərginliyi artıran tərəflərin məqsədləri çoxşaxəlidir. Bir çox hallarda regional güc balansını öz xeyrinə dəyişmək istəyən qüvvələr yaranmış qarışıqlıqdan istifadə edərək strateji üstünlük əldə etməyə çalışırlar”.
Tural İsmayılov hesab edir ki, burada əsas məqsəd başqadır. Bəzən ayrı-ayrı qüvvələr sadəcə hərbi güc nümayişi ilə kifayətlənmir, həm də rəqib tərəfi diplomatik müstəvidə zəiflətmək və ya onun daxili sabitliyini sarsıtmaq niyyəti daşıya bilirlər:
“Diplomatik kanalların qapalı olduğu və etimadın minimuma endiyi şəraitdə baş verənlər bir növ maraqlar toqquşmasının nəticəsi kimi qiymətləndirilir. Nəticə etibarilə, vəziyyətin böyük bir müharibəyə çevrilməməsi üçün tərəflərin hər birinin atacağı növbəti addımlar həlledici rol oynayacaq. Tarixən bu cür gərginliklərdə hərbi ritorikadan çox, soyuqqanlı diplomatik təşəbbüslərin və dialoq cəhdlərinin müsbət nəticə verdiyi müşahidə olunub. Hazırkı mürəkkəb mühitdə məsələnin tənzimlənməsi daha çox regional sabitliyə xidmət edən aktorların göstərəcəyi təmkindən və vəziyyəti idarə etmək iradəsindən asılıdır”.
Siyasi ekspertin qənaətinə görə, indiki şəraitdə ən rasional yol qarşılıqlı addımların daha böyük fəlakətlərə yol açmaması üçün vəziyyətin dondurulması və tərəflərin səbrli davranmasıdır.
E.Paşasoy,
Musavat.com
