ABŞ ordusunda milyon dollardan çox dəyəri olan hərbi ərzaq paylarının oğurlanması işi üzrə hökm çıxarılıb.
Musavat.com xəbər verir ki, 47 yaşlı hərbçi Cozef Lavar Devis Texas münsiflər heyəti tərəfindən 1,1 milyon dollardan çox dəyərində on minlərlə MRE hərbi qida payını oğurlamaqda təqsirli bilinib. Bu barədə ABŞ Ədliyyə Nazirliyi məlumat yayıb.
Məlumata görə, oğurluq 2020-ci ilin fevral-avqust ayları arasında baş verib. Bu müddətdə 200 palet hərbi ərzaq payı mənimsənilib. Federal məhkəmə sənədlərində bildirilir ki, hər paletdə təxminən 576 MRE qida payı olub.
Beləliklə, ümumilikdə təxminən 115 min 200 MRE payı oğurlanıb. Onların bir hissəsinin istifadə üçün yararlı, digər hissəsinin isə yararsız vəziyyətdə olduğu qeyd edilir.
MRE hərbçilərin çöl şəraitində istifadə etdiyi əsas qida rasionudur. Bu paylar ağır iqlim və döyüş şəraitində uzun müddət saxlanılması, soba və ya mikrodalğalı soba olmadan istehlak edilməsi üçün hazırlanır.
Əvvəllər MRE menyusunda mal ətindən hazırlanan yemək və ağcaqayın şərbətli sosiska kimi qidalar yer alırdı. 2025-ci ildə isə Pentaqon Tay üsulunda köri souslu toyuq və şokoladlı-fındıqlı qəlyanaltılar kimi yeni dadların sınaqdan keçirildiyini açıqlayıb.
Musavat.com
