Ekvadorun mərkəzindəki Alausidə torpaq sürüşməsi nəticəsində azı 27 nəfər ölüb.
“Report” xəbər verir ki, bu barədə ölkənin Baş Prokurorluğu məlumat yayıb.
“Alausidə torpaq sürüşməsi sonucunda 27 nəfərin öldüyü təsdiqlənib”, - qurumun tviter hesabında verdiyi açıqlamada deyilib.
Hadisə yerində axtarış-xilasetmə əməliyyatı davam edir. Martın 31-nə olan vəziyyətə əsasən, 67 nəfər itkin düşüb.
Xatırladaq ki, martın 27-nə keçən gecə sürüşmə yaşayış binalarını uçurub. Ümumilikdə təbii fəlakət zonasında 500-dən çox insan olub. Qırmızı Xaçın qiymətləndirməsinə görə, 163 ev dağılıb və ya zədələnib.
Qeyd edək ki, daha öncə 21 nəfərin öldüyü bildirilirdi.
