Ciddi xəstəlikləri olmayan 40 yaşdan yuxarı insanlar üçün bir-iki qədəh qırmızı şərab müəyyən fayda verə bilər.
Musavat.com Publika.az-a istinadən xəbər verir ki, Qlobal Xəstəlik Yükü layihəsinin tədqiqatçıları məlumatların genişmiqyaslı meta-analizi nəticəsində bu qənaətə gəliblər. Layihə Bill və Melinda Qeyts Fondu tərəfindən maliyyələşdirilir. Müəllifləri 204 ölkədən 15-95 yaş arası kişi və qadınların məlumatlarını tədqiq ediblər.
“The Lancet” tibb jurnalında dərc olunan məqalədə deyilir ki, təhlillərin nəticələrinə görə, 15-39 yaş arası insanlara spirt yalnız zərər verir. Alkoqoldan sui-istifadə edənlərin 76,7%-i kişilərdir. Avtomobil qəzaları, intiharlar və qətllər də daxil olmaqla, alkoqolla əlaqəli bütün xəsarətlərin 60% -i kişilərə aiddir. Ancaq qırx yaşdan yuxarı insanlar üçün spirt ürək-damar xəstəlikləri, insult və diabet riskini azaltmağa kömək edə bilər.
Rusiyalı narkoloq, psixiatr Mixail Tetyuşkin hesab edir ki, belə bir məqalə çox böyük ziyan vura bilər. Müəlliflərin özləri də materialın bəzi çatışmazlıqlarını etiraf edirlər.
“Həkimlərimiz, xüsusən də narkologiya və psixiatriyadan heç bir anlayışı olmayanlar xəstələrə qırmızı şərabın ürəyə faydalı olduğunu söyləməyi xoşlayırlar. Lakin xəstələr çox vaxt bir stəkanla bağlı şərtə tamamilə məhəl qoymurlar”, - Tetyuşkin "RİA Novosti"yə müsahibəsində yekunlaşdırıb.
