Avropa liderləri Ukrayna və Moldova ilə Avropa İttifaqına üzvlüklə bağlı danışıqlara başlamaq və Gürcüstana namizəd statusu vermək qərarına gəliblər.
Musavat.com xarici mediaya istinadla xəbər verir ki, Avropa İttifaqı Şurasının prezidenti Şarl Mişel jurnalistlərə bu qərarı açıqlayıb.
Ukrayna prezidenti Vladimir Zelenski Brüsseldə keçirilən sammitdə qəbul edilən qərarı ölkəsinin və Avropanın “qələbəsi” adlandırıb.
“Bu, Ukraynanın qələbəsidir. Bütün Avropa üçün qələbə. Həvəsləndirən, ruhlandıran və gücləndirən qələbə”, – Zelenski X sosial şəbəkəsindəki yazısında yazıb.
Moldova prezidenti Maya Sandu da X-dəki yazısı vasitəsilə bu qərarın bütün ölkəyə gətirdiyi sevinci bildirdi.
“Bu gün Moldova Aİ-yə üzvlük danışıqları üçün icazə almaqla yeni səhifə açır. Bu gün biz Avropanın isti qucağını hiss edirik. Dəstəyinizə və bu yolda gedə biləcəyimizə inamınıza görə təşəkkür edirəm”, - o yazıb.
Ukrayna və Moldova 2022-ci ilin fevralında Rusiyanın Ukraynaya genişmiqyaslı işğalına başlamasından sonra Aİ-yə üzv olmaq üçün müraciət edib. Hər iki ölkəyə namizəd statusu ötən ilin iyununda verilib.
Macarıstanın baş naziri Viktor Orban Facebook-da paylaşdığı videoda bir daha bəyan edib ki, onun fikrincə, Kiyev Aİ-yə üzvlüklə bağlı danışıqlara hazır deyil.
"Macarıstan mövqeyini dəyişmir", - deyə o, Aİ-nin digər 26 üzvü Ukrayna ilə danışıqlara başlamaqda israrlıdır. Onun sözlərinə görə, nəticədə Macarıstan 26 ölkənin öz yolu ilə gedə biləcəyinə qərar verib və bu qərardan uzaqlaşıb.
Rusiya prezidentinin sözçüsü Dmitri Peskov isə Ukrayna və Moldovanın Aİ-nin kriteriyalarına cavab vermədiyini bildirib.
Musavat.com
