ABŞ-ın Rusiyanın bank sistemindəki sanksiyalardan yayınmasına qarşı mübarizəsi müsbət nəticələrini verməyə başlayıb.
The Wall Street Journal-ın yazdığına görə, sanksiyalar tətbiq olunandan az sonra Rusiya müxtəlif ölkələr vasitəsilə onlardan yayınmaq yollarını tapdı. Lakin ötən ilin sonlarından ABŞ-ın göstərdiyi səylər nəticəsində yayınma nöqtələri bir-birinin ardınca sıradan çıxır.
Qəzetin hazırladığı materialdan aydın olur ki, Dubayın əsas dövlət bankı rusiyalı oliqarxların və Rusiya neftinin treyderlərinin bəzi hesablarını bağlayıb. Türkiyəli kreditorlar Rusiya ilə əlaqəli bizneslərlə işləməkdə getdikcə daha ehtiyatlı davranırlar. ABŞ digər mühüm maliyyə mərkəzi olan Vyanadakı bankirlərə də xəbərdarlıq edib: "Bunlar ABŞ rəsmilərinin səfərlərindən və ticarət firmalarına və digərlərinə qarşı son sanksiyaların ardınca baş verir. Dekabrın sonunda Ağ Ev ABŞ Xəzinədarlığına Rusiya hərbi sənaye bazası ilə əlaqəli əməliyyatlara görə xarici bankları cəzalandırmaq imkanı verən daha böyük sanksiya səlahiyyətləri verdi".
Dubayda yerləşən bank nəhəngi Emirates NBD-nin bu dəyişikliklərdə mərkəzi rol oynadığı deyilir. Moskvanın 2022-ci ildə Ukraynaya təcavüzündən sonra rus biznesləri və oliqarxları BƏƏ-yə axışıb. Emirates NBD ən böyük benefisiarlardan biri olmuşdu. Bir ABŞ rəsmisi bildirib ki, bank Rusiyanın əhəmiyyətli neft əməliyyatlarını həyata keçirirdi və sərvətləri üçün təhlükəsiz sığınacaq axtaran ruslara xidmət edən bir departament yaratmışdı: "Lakin son aylar ABŞ BƏƏ-yə güclü təzyiq göstərir. Vaşinqton bu ölkəyə Maliyyə Nazirliyi və Dövlət Departamentinin rəsmilərini göndərib, həmçinin BƏƏ-də yerləşən və Rusiya yönümlü neft treyderi Voliton kimi şirkətlərə qarşı yeni sanksiyalar tətbiq edib. Bununla əlaqədar olaraq, Emirates NBD öz kursunu dəyişdi. O, Rusiya ofisini bağladı, Rusiyadan rubl köçürmələrini qəbul etməyi dayandırdı və çoxlu sayda Rusiya hesablarını bağladı”.
Əmirliyin maliyyə mütəxəssislərinin bildirdiyinə görə, Emirates NBD Rusiya gübrə nəhəngi “Uralkali” və rusiyalı iş adamı İvan Tavrinin hesablarını bağlayıb.
Türkiyədə dəyişikliklər
ABŞ hökuməti Ankaranı Rusiya ilə artan iqtisadi münasibətlərini tənzimləməyə məcbur etdiyi üçün Türkiyədə də iqlim dəyişdi. ABŞ türk şirkətlərini Rusiyanın sui-istifadələrini asanlaşdırdıqlarına görə cəzalandırıb və hökuməti sanksiyaların tətbiqinə kömək etməyə çağırıb. Türkiyəli ixracatçılar ödənişlərin qəbulunda problemlərdən şikayətlənirlər. Ticarət Nazirliyinin məlumatına görə, fevral ayında Türkiyənin Rusiyaya ixracatı bir əvvəlki ilə nisbətən 33 faiz azalaraq 670 milyon dollara düşüb.
Avstriyada işlər
ABŞ Mərkəzi və Şərqi Avropanın bank mərkəzi olan Avstriyanı da hədəfə alıb və bu yaxınlarda Xəzinədarlığın sözçüsü Anna Morrisi hökumət və Rusiyada törəmə şirkəti olan Raiffeisen Bank International daxil olmaqla banklarla görüşmək üçün göndərib.
Xəzinədarlıq bildirib ki, səfər maliyyə firmalarına qismən “banklar üçün artan risklər yaratmaq” məqsədi daşıyan yeni sanksiya səlahiyyətlərini başa düşməyə yönəlmiş daha geniş beynəlxalq kommunikasiya kampaniyasının bir hissəsidir. Baxmayaraq ki, Moskva biznesdən çıxmağı çətinləşdirib, Raiffeisen Bank Rusiya bölməsini satmağa və ya ləğv etməyə çalışır.
Rusiyanın enerji resurslarına təzyiqin artması
ABŞ-ın ikiqat səyləri Ukraynadakı müharibənin maliyyə əsasını təşkil edən Rusiyanın enerji ixracında müəyyən fasilələrə səbəb olub. ABŞ rəsmiləri, Əmirliyin maliyyə ekspertləri və başqaları bildiriblər ki, ABŞ-ın enerji ödənişlərini məhdudlaşdırmaq üçün banklara təzyiqi son həftələrdə fəsadlara səbəb olub. Bununla belə, Rusiya nefti hələ də maneəsiz axır.
Jurnalistlərin dediyinə görə, keçən ay çirkli pulların yuyulması ilə mübarizə üzrə beynəlxalq qurum olan Financial Action Task Force BƏƏ-ni çatışmazlıqların aradan qaldırılmasında əhəmiyyətli irəliləyiş olduğunu əsas gətirərək, tələblərə cavab verməyən ölkələrin boz siyahısından çıxarıb.
Qeyd edək ki, Rusiyaya sanksiyalı malların çatdırılmasında mühüm həlqə olan Ermənistan da martın 30-dan Rusiya Mərkəzi Bankın “Mir” kartlarına xidməti tamamilə dayandırır.
Bundan əlavə, Çinin 4 ən böyük bankı da Rusiya ilə ticarət əməliyyatlarının maliyyələşdirilməsini dayandırıb.
Musavat.com
