2024-cü ildə mindən çox qazaxıstanlı prezident təqaüdü alacaq.
Musavat.com kazax24 saytına istinadla xəbər verir ki, Qazaxıstan Respublikasının elm və ali təhsil naziri Sayasat Nurbekin əmrinə əsasən, 2024-cü ildə prezident təqaüdü 1014 bakalavr və 5 magistratura tələbəsinə veriləcək. Təqaüdlərin bölüşdürülməsi 57 ali təhsil müəssisəsi və ali təhsildən sonrakı elmi müəssisələr arasında aparılıb.
Bu ödənişin məbləği bakalavr və magistratura tələbələri üçün minimum təqaüddən 100 faiz yüksəkdir və bakalavriat tələbələri üçün 83,796 tenge (bizim pulla - 318 manat), magistr tələbələri üçün isə 194 048 tenge (737 manat) təşkil edir.
Bu təşəbbüs bakalavriat və magistrantların elmi-tədqiqat və tədris fəaliyyətini stimullaşdırmaq, ən qabiliyyətli və istedadlı nümayəndələri dəstəkləmək, həmçinin onların intellektual potensialını inkişaf etdirmək məqsədi daşıyır.
Təqaüdlər aylıq ödənilir və müstəsna olaraq “əla” (A, A-) kimi qiymətləndirilən yüksək nəticələri saxlayan 3-cü kursdan tam ştat tələbələri və ikinci kursdan bakalavrlar üçün nəzərdə tutulub. Bu, həm dövlət təhsil sifarişi ilə təhsil alan tələbələrə, həm də ödənişli əsaslarla təhsil alanlara aiddir.
Prezident təqaüdü aşağıdakı kateqoriyalardan olan tələbələrə və bakalavrlara verilir: respublika və beynəlxalq olimpiadaların qalibləri, yaradıcılıq müsabiqələrinin, idman yarışlarının və festivalların iştirakçılarına, habelə kəşf və ixtira müəlliflərinə. Həmçinin bu təqaüdə elmi məqalələr toplularında, respublika və ya beynəlxalq elmi jurnallarda əsərlərini dərc etdirənlər, elmi-tədqiqat fəaliyyəti ilə fəal məşğul olanlar, ictimai, mədəni və idman həyatına mühüm töhfələr verənlər də iddia edə bilərlər.
Musavat.com
