Adıçəkilən mərkəzdə vəhhabilərin İŞİD-çi dəstələri formalaşdırdıqları iddia olunur. Mənbənin bildirdiyinə görə, günün müəyyən zamanlarında sələfi təriqətinin nümayəndələri mərkəzin atıcılıq meydanında təlim keçirlər. Beləliklə də onlar gələcək döyüşlərə hazırlaşırlar.
Səsləndirilən iddiaların nə dərəcədə doğru olub-olmadığını aydınlaşdırmaq üçün həmin əraziyə yollandıq. Mərkəzdə demək olar ki, kimsə yox idi. “Baku Paintball Center”in içərisini gəzdiyimiz zaman heç kim gözə dəymədi. Yalnız mühafizəçi vardı. Atıcılıq meydanının əsas qapısı isə bağlı idi. Yaxınlıqda yaşayan sakinlər 6 aya yaxındır ki, bu meydanın qapısının bağlı olduğunu bildirdilər. Onu da qeyd etdilər ki, bağlı olmasına baxmayaraq, hər gün bağlı qapı arxasından səslər gəlir...
Apardığımız bir saatlıq müşahidəmizdən sonra ətrafı hündür hasarlara alınan meydanda insan səsləri eşitdik. İçəridən maşın və atəşə oxşayan səslər gəlirdi. Qapını çox döysək də, açan olmadı. Qala divarlarına bənzəyən hasarlardan içərini görmək mümkün deyildi. Mərkəzin ətrafında polis maşınlarının gözə dəyməsi də müəmmalı məsələlərdən biri idi.
Bir saatlıq müşahidələrimiz onu deməyə əsas verdi ki, əslində atıcılıq meydanı bağlanmayıb. Təlim-məşq üçün meydanın daxilindəki əşyaların qalması da bunu sübut edir. Müəmmalı məsələ isə qapıların bağlı olmasıdır.
Nəzərə çatdıraq ki, son vaxtlar Azərbaycandan İŞİD-ə qoşulmaq üçün ölkədən qeyri-leqal yollarla gedənlərin sayı artır. Axır bir neçə ayda 50-yə yaxın şəxsin müxtəlif marşrutlarla Suriyaya getdiyi deyilir.
Eyni zamanda İŞİD-ə qoşulan xeyli azərbaycanlının da ölüm xəbəri, yaxud meyiti gəlib. İki gün öncə isə İŞİD düşərgəsindəki azərbaycanlıların daha bir geniş videosu yayılıb.
***
Keşlə qəsəbəsi Bakının ən böyük yaşayış massivlərindən biridir. Burada bu cür təlimlərin keçirilməsindən hüquq-mühafizə orqanlarının xəbərsiz olduğu inandırıcı görünmür. Belə bir informasiya qəzet redaksiyasına gəlib çıxırsa, jurnalistlər bundan xəbərdar olursa, polisin və xüsusi-xidmət orqanlarının çoxdan bilgisi olar, hər halda.
Ümid edirik ki, milli təhlükəsizliyimiz üçün son dərəcə vacib olan bu məsələ rəsmən araşdırılacaq və bu barədə müvafiq orqanlar mətbuata da məlumat verəcəklər .
Cavanşir ABBASLI
Fotolar müəllifindir
