Bu gün Ukrayna prezidenti Volodimir Zelenski və həyat yoldaşı Yelenanın Yalta şəhərindəki mənzili açıq hərracda satılıb.
Musavat.com Rusiya mətbuatına istinadən xəbər verir ki, yeni sahiblər Krımın Yalta şəhərindəki əmlaka görə 44,3 milyon rubl ödəyiblər - bu, başlanğıc qiymətindən 20 milyondan çox çoxdur.
Hərrac elektron qaydada, dövlət və bələdiyyə əmlakının satışı üzrə hərracların keçirildiyi “GIS Bidding” portalında keçirilib. Yalnız iki iştirakçı Zelenskinin keçmiş evini almaq üçün mübarizə aparıb. Hərracın qalibi Moskva sakini Olqa Lipovetskaya olub. Onun sözlərinə görə, mənzil şəxsi yaşayış məqsədilə alınıb. Əmlakın yeni sahibi qeyd edib ki, Yaltada uşaqlarla yaşamaq üçün əlverişli şərait var və bu, alış üçün daşınmaz əmlak seçərkən əsas amil olub.
Lipovetskayanın əri İqor əlavə edib ki, nə o, nə də arvadı hərracın sonuna qədər mənzilin əvvəl kimə məxsus olduğunu bilməyiblər. İqorun dediyinə görə, həyat yoldaşının Ukrayna liderinin keçmiş evini hərracda alması xoşbəxt təsadüf olub.
Qeyd edək ki, Zelenskilərin mənzili Livadiya kəndində, Baturina küçəsi 44 A ünvanında, "İmperator" elit yaşayış kompleksinin beşinci mərtəbəsində yerləşir.
Elena Zelenskayanın adına rəsmiləşdirilən mənzil 2013-cü ildə ukraynalı iş adamı və Ali Radanın keçmiş deputatı Aleksandr Buryakdan 163,8 min dollara alınıb. Zelenski 2019-cu ildə prezident vəzifəsinə keçdikdən sonra onun qərargahı müqavilədən sonra bütün vergi və rüsumların ödənildiyini bildirib. Krım Dövlət Reyestri dövlət başçısının mənzil hüquqlarını tanıyıb.
Krımın Dövlət Şurası mayın 24-də Yaltadakı Zelenskinin mənzilinin milliləşdirilməsi barədə qərar qəbul edib. Yarımadanın rəhbəri Sergey Aksenov bu addımını onunla izah edib ki, “Rusiyanın düşmənləri” Krım ərazisində pul qazanmamalıdır. Sonradan məlum olub ki, daşınmaz əmlakın satışından əldə olunan gəlirlər Ukraynadakı işğalçı müharibədə iştirak edən əsgərlərə yardıma gedəcək.
Musavat.com
