Liviyada ölkənin ən böyük yatağı olan “Şərara”da neft hasilatı icazəsiz giriş səbəbindən avqustun 4-də qismən dayandırılıb.
Musavat.com İnterfaksa istinadən xəbər verir ki, “Sharara”nın maksimal hasilat gücü sutkada 320 min bareldir. S&P Global Commodity Insights-a görə, hazırda hasilat itkiləri sutkada 28-70 min barel arasında dəyişir.
“Sharara” MOK, Fransanın TotalEnergies, İspaniyanın Repsol, Avstriyanın OMV və Norveçin Equinor şirkətlərinin birgə layihəsidir.
Liviya Afrikanın təxmin edilən ən böyük neft ehtiyatlarına nəzarət edir. Onun neft ehtiyatlarının həcmi 48 milyard barel qiymətləndirilir. Ölkə ortamüddətli perspektivdə hasilatı artırmaq üçün iddialı planlara malikdir. 2024-cü ilin əvvəlində MOK sədri Farhat Benqdara növbəti beş il ərzində hasilatı sutkada 2 milyon barelə çatdırmağı planlaşdırdığını açıqladı. Bununla belə, siyasi iğtişaşlar və maliyyələşmənin çətinliyi proqramın icrasına təhdidlər yaradır. Liviyada 2011-ci ildə Müəmmər Qəddafiyə qarşı üsyandan sonra neft və qaz ixracını pozan etirazlar adi hala çevrilib.
Nisbi siyasi sabitlik son vaxtlar Liviyada neft hasilatını təqribən 1,27 milyon barel səviyyəsində saxlamağa imkan verib ki, bu da Qəddafi rejiminin devrilməsindən əvvəlki 1,6 milyon bareldən xeyli aşağıdır.
Liviya nefti ümumiyyətlə yüngül, az kükürdlüdür, ondan daha böyük miqdarda orta distillat və benzin əldə olunur ki, bu da onu Aralıq dənizi və şimal-qərbi Avropada məşhur edir.
Liviyada hasilatın məhdudlaşması xəbərinin dünya neft bazarına təsiri hiss olunmayıb.
Musavat.com
