Türkiyənin Kənd Təsərrüfatı və Meşə Nazirliyi ölkəyə buğda idxalını müvəqqəti məhdudlaşdırmağı planlaşdırır.
Musavat.com xəbər verir ki, bu barədə nazirliyin mətbuat xidməti məlumat yayıb.
Məlumatda qeyd olunur ki, qadağa 2024-cü il iyunun 21-dən oktyabrın 15-dək qüvvədə olacaq:
"Bu müddət həmin tarixə qədər inkişaf edəcək bazar şərtlərindən asılı olaraq bir qədər də uzadıla bilər".
Kənd Təsərrüfatı Nazirliyi qeyd edib ki, tədbir ölkəyə buğda idxalının artması fonunda məhsulun qiymətlərinin əhəmiyyətli dərəcədə aşağı düşdüyü çətin yay mövsümündə türk istehsalçılarına dəstək məqsədi daşıyır.
Qeyd edək ki, Rusiya dünyanın ən böyük buğda ixracatçılarından biridir. Taxıl İxracatçıları Birliyinin məlumatına görə, aprelin ortalarına qədər Türkiyə bu mövsüm Misirdən sonra Rusiya buğdasının ikinci ən böyük alıcısı olub, üçüncü yerdə Banqladeş olub.
Rusiya kənd təsərrüfatı naziri Oksana Lut bildirib ki, Türkiyənin buğda idxalına qadağa qoyması səbəbindən Rusiya taxıl ixracında çətinlik çəkməyəcək:
“Biz burada heç bir çətinlik görmürük. Nəzərə alsaq ki, bu mövsüm məhsul son iki illə müqayisədə xeyli az olacaq, bunun heç bir mənfi təsiri olmayacaq. Bizim buğdaya çoxlu sayda ölkədə ehtiyac var”.
Nazir bu mövsümdə gözlənilən istehsalla bağlı proqnozu hələ dəyişmədiklərini bildirib:
“Artıq dediyimiz kimi, proqnozumuz taxıl üçün 132 milyon ton, buğda üçün isə 86 milyon ton səviyyəsində qalır. Hazırda yağışa ümid edirik, ancaq quraqlıq olarsa, bizdə bu həcm olmayacaq".
Xanım Lutun sözlərinə görə, son yay və sentyabr aylarında Türkiyəyə təxminən 3 milyon ton buğda ixrac edilib: “Türkiyənin alışda ikinci yerdə olduğunu nəzərə alsaq, müvafiq olaraq, əlavə 3 milyon tonumuz var. İxracatçılar indi həcmləri haraya bölüşdürəcəklərini düşünürlər. Bu gün Misirlə (Misirin Ticarət və Sənaye Naziri Əhməd Samirlə) görüş keçirildi, çünki onlar daha çox buğda almağa hazırdırlar. Onlar üçün bu, əsas məhsullardan biridir”.
Nazir qeyd edib ki, Türkiyənin qərarının ilkin şərtləri bəllidir - o, öz bazarını dəstəkləmək istəyir:
“Bu, müvəqqəti tədbirdir, heç bir sual yoxdur, biz öz istiqamətimizi dəyişdirəcəyik, bundan sonra hər halda bizim strateji tərəfdaşımız olan Türkiyə ilə ticarətə baxacağıq”.
Musavat.com
