ABŞ Prezidenti Donald Tramp bəyanatla çıxış edib. O, Tehranın mediaya sızdırdığı iddia olunan razılaşma şərtlərini saxta xəbər adlandırıb və İran rəhbərliyini beynəlxalq ictimaiyyəti aldatmağa çalışmaqda günahlandırıb.
Musavat.com xəbər verir ki, Tramp sosial şəbəkədə yaydığı açıqlamada bildirib ki, İran tərəfinin mediaya ötürdüyü məlumatlar ABŞ-la müzakirə olunan yazılı təkliflərlə heç bir əlaqə daşımır.
“İranın saxta xəbərlərə sızdırdığı şərtlərin yazılı şəkildə razılaşdırılmış şərtlərlə heç bir əlaqəsi yoxdur”, - deyə ABŞ prezidenti vurğulayıb.
Onun sözlərinə görə, İran rəsmilərinin son günlər verdiyi açıqlamalar da reallığı əks etdirmir:
“Onların söylədikləri, o cümlədən guya razılaşmanın əldə olunması barədə zəif və aciz bəyanatları həqiqətlə heç bir əlaqəsi olmayan söz yığınından ibarətdir”.
Trampın bəyanatı Vaşinqton və Tehran arasında aylardır davam edən mürəkkəb diplomatik danışıqlar fonunda səslənib. Son günlər İran mediasında yayılan məlumatlarda tərəflərin müəyyən kompromisə yaxınlaşdığı, hətta nüvə proqramı ilə bağlı çərçivə razılaşmasının müzakirə olunduğu iddia edilirdi.
Lakin Trampın sözləri göstərir ki, ən azı Vaşinqtonun mövqeyinə görə, tərəflər arasında hələ ciddi fikir ayrılıqları qalmaqdadır.
ABŞ prezidenti İran hakimiyyətini vicdanlı və dürüst tərəfdaş olmamaqda da ittiham edib:
“Onlarla işləmək çox çətindir. Bu rejim üçün vicdanlı danışıqlar anlayışı mövcud deyil. Bu, heyrətamizdir”.
Bu ifadələr Tramp administrasiyasının İran rəhbərliyinə qarşı sərt ritorikasının davamı kimi qiymətləndirilir.
Trampın açıqlamasında diqqət çəkən digər məqam isə Hörmüz boğazı ilə bağlı ittiham olub. ABŞ prezidenti bildirib ki, İran qüvvələrinin ötən gecə boğazdan çıxan Hindistan gəmilərinə qarşı pilotsuz uçuş aparatları ilə hücum cəhdi baş tutub.
Onun sözlərinə görə, həmin hücum tamamilə dəf edilib.
“Onların ötən gecə Hörmüz boğazından çıxan Hindistan gəmilərinə qarşı pilotsuz aparatlarla həyata keçirməyə çalışdıqları hücumun tamamilə qarşısı alınıb. Bu, qətiyyən qəbuledilməzdir”, - deyə Tramp bildirib.
Əgər bu iddia təsdiqlənərsə, hadisə beynəlxalq enerji təhlükəsizliyi baxımından ciddi nəticələr doğura bilər. Çünki dünya üzrə dəniz yolu ilə daşınan neftin təxminən beşdə biri Hörmüz boğazından keçir və burada baş verən hər hansı hərbi insident dərhal qlobal bazarlara təsir göstərir.
Tramp bəyanatının sonunda İrana açıq xəbərdarlıq edib:
“Onlar özlərinə gəlməlidirlər və bunu çox tez etməlidirlər”.
Bu ifadə Vaşinqtonun dözüm həddinin azalması və İranın davranışlarının regional təhlükəsizlik üçün risk kimi qiymətləndirilməsi barədə mesaj kimi qəbul olunur.
Hazırda nə İran hökuməti, nə də beynəlxalq müşahidə missiyaları Trampın səsləndirdiyi Hörmüz boğazı insidenti barədə müstəqil təsdiq təqdim etməyiblər. Bununla belə, ABŞ prezidentinin ardıcıl sərt açıqlamaları göstərir ki, Vaşinqton-Tehran xəttində gərginlik yenidən təhlükəli həddə yaxınlaşır.
E.Məmmədəliyev,
Musavat.com
