Ermənistanın "Hraparak" qəzetinin məlumatına görə, müdafiə naziri Suren Papikyan martın 15-də nazirliyin bölmələrində "Artsax Respublikası" ifadəsinin işlədilməsinin qadağan edilməsi ilə bağlı məxfi əmr imzalayıb.
Nəşrin xəbərinə əsasən, nazirin əmrində yazılıb: ""Artsax Respublikası" sözünü leksikondan çıxarmaq, yalnız "Dağlıq Qarabağ" sözlərindən istifadə etmək lazımdır".
Papikyanın bu məxfi əmri nəyə hesablanıb?
Tanınmış hərbi ekspert Alp Arslan İmamqulu Musavat.com-a bildirib ki, Ermənistan Müdafiə Nazirliyində hər hansı bir məxfi əmrin imzalanması və bunun mediaya sızması inandırıcı deyil.
"Belə bir şey olsa belə, bilirik ki, Ermənistan həmişə ikiüzlü siyasət yürüdüb və bu, bizim üçün heç bir şəkildə ciddi bir təminat deyil. Onlar Azərbaycan toponimləri ilə bağlı yanlış ifadələr işlətməkdən, eyni şəkildə vaxtaşırı olaraq dırnaqarası "artsax"ın öz mediasında bunu səsləndirmələrindən geri durmayıblar. Bundan sonra da geri duracaqlarını düşünmürəm. İstənilən halda Azərbaycanın atacağı addımlar məlumdur. Azərbaycanın dövlət sərhədləri var, ərazi bütövlüyü var, onun təhlükəsizliyi var. Bu istiqamətdə bundan sonra ard-arda adekvat, sərt addımlar atılmalıdır. Bunun da bir adı var – genişmiqyaslı antiterror əməliyyatları. Əks halda nə Ermənistan, nə də onun havadarları öz əməllərindən heç bir şəkildə geri durmayacaqlar", - hərbi ekspert vurğulayıb.
Xatırladaq ki, Ermənistanın müdafiə naziri Suren Papikyan parlamentdəki çıxışında "Biz şeytanla da əməkdaşlığa hazırıq" - deyə bildirib.
Musavat.com
