Rusiya Federasiyasında daxili bazarda benzinin, dizel yanacağının və kerosinin kəskin qıtlığı fonunda yaranmış gərgin vəziyyət parlamentin yuxarı palatasında rəsmi şəkildə etiraf edilib. Rusiya Federasiya Şurasının sədri Valentina Matviyenko ölkədəki yanacaq böhranı barədə danışarkən yaranmış vəziyyəti süni şəkildə dramatikləşdirməməyə çağırıb.
Musavat.com xəbər verir ki, Federasiya Şurasının plenar iclasında çıxış edən Valentina Matviyenko yanacaq tədarükündə yaranan ciddi problemlərin birbaşa ölkə rəhbərliyinin nəzarətində olduğunu bildirib: "Həqiqətən də hazırda ölkədə yanacaqla bağlı vəziyyət sadə deyil, olduqca ağırdır. Hətta bu yaxınlarda ölkəmizin Prezidenti kənd təsərrüfatı sahəsinin təcili şəkildə benzin, kerosin və dizel yanacağı ilə təmin edilməsi məsələsinə dair xüsusi və geniş rəsmi müşavirə keçirib".
Matviyenko böhranın aradan qaldırılması üçün hökumətin gücləndirilmiş iş rejiminə keçdiyini diqqətə çatdırıb və bunun üçün müəyyən zaman tələb olunduğunu vurğulayıb: "Bazar ertəsi günü biz şəxsən Baş nazirlə görüşdük və bu strateji mövzunu ətraflı müzakirə etdik. Hazırda Baş nazirin müavini Aleksandr Novakın rəhbərliyi altında hökumətin xüsusi işçi qrupu yaranmış bu acınacaqlı vəziyyəti düzəltmək üçün hər gün intensiv rejimdə işləyir və konkret həll yolları tapır. Sadəcə olaraq prosesin tam qaydasına düşməsi üçün bir qədər vaxt lazımdır. Mən tam əminəm ki, problem mütləq həll olunacaq və bunun üçün hökumət tərəfindən bütün zəruri qərarlar artıq qəbul edilir. İndi əsas məsələ vəziyyəti dramatikləşdirmək, ah-vay edib oturmaq deyil, hamılıqla birlikdə bu vəziyyətdən çıxış yolları tapmaqdır".
Musavat.com
