New York Times-ın yazdığına görə, Los-Anceles şəhəri ciddi yanğınlara hazır olsa da, eyni vaxtda baş verən dörd böyük yanğının öhdəsindən gəlməkdə çətinlik çəkib. Şəhərin yanğınsöndürən kapitanlarından biri qəzetə bildirib ki, “Çox sayda evi qorumaq lazım idi, lakin texnika kifayət etmirdi.”
Yanğınsöndürmə xidmətlərinin hadisəyə yaxşı hazırlaşdığı bildirilsə də, müasir dövrdə yanğınların intensivliyinin yeni reaksiyalar tələb edib-etmədiyi ilə bağlı suallar ortaya çıxıb.
Musavat.com New York Times-ə istinadla qeyd edir ki, bu dəfəki yanğınlar daha çox itkiyə səbəb olub.
Azı 11 nəfərin həyatını itirdiyi, minlərlə evin məhv olduğu bu yanğınlar Kaliforniyada son onillikdə artan iri miqyaslı yanğınların ciddi problemə çevrildiyini bir daha göstərir.
Faciə həmçinin federal, ştat, dairə və şəhər yanğınsöndürmə xidmətlərinə ayrılan resursların yetərliliyi ilə bağlı sualları yenidən gündəmə gətirib. Mütəxəssislər, hazırkı yanğınsöndürmə texnologiyalarının effektivliyi və bu cür genişmiqyaslı yanğınlara qarşı mübarizə aparmaq üçün əlavə təkmilləşdirmələrə ehtiyac olub-olmadığını müzakirə edirlər.
Son illər Kaliforniyada baş verən təbii fəlakətlərin intensivliyi yeni yanaşmaların və resursların artırılmasının zəruriliyini göstərir.
Musavat.com
