Qırmızı dənizdə yükdaşımalarda fasilələr 2024-cü ilin sonuna qədər davam edə bilər.
Musavat.com xəbər verir ki, bu xəbərdarlıqla “Financial Times” qəzetində qlobal daşımaların beşdə birini təmin edən AP Moller-Maersk Korporasiyasının baş direktoru Vinsent Klerk çıxış edib:
“Biz görürük ki, Qırmızı dənizdəki çətin vəziyyət qısamüddətli olmayacaq”.
Klerk hesab edir ki, korporasiyanın konteyner gəmilərinin tezliklə Süveyş kanalı vasitəsilə əvvəlki marşrutlarına qayıtması ehtimalı azdır. Ola bilsin ki, “köhnə marşrutla yükdaşıma ilin sonunda bərpa olunsun”.
2023-cü ilin sonundan etibarən şirkət Qırmızı dəniz vasitəsilə yük daşınmasını dayandırıb və gəmiləri Ümid burnu ətrafından Aralıq dənizindən Asiyaya yönləndirməyə başlayıb. Onun gəliri 2023-cü ilin eyni dövrü ilə müqayisədə birinci rübdə 13 faiz azalaraq 12,4 milyard dollar təşkil edib.
Qeyd edək Yəmən husilərinin “Ənsar Allah” qruplaşması tərəfindən Qırmızı dənizdə gəmilərə hücumlardan sonra nəqliyyatın yönləndirilməsi səbəbindən Süveyş kanalı ilə yükdaşımaları ötən il aprel ayına nisbətən üçdə iki azalıb. Digər mühüm gəmiçilik arteriyası olan Bab əl-Məndab boğazında yükdaşımaları 59 faiz azalıb.
Bir sıra gəmiçilik şirkətləri, o cümlədən AP Moller-Maersk tərəfindən Ümid burnu ətrafında uzun marşrut üzrə - üstəgəl 20 gün - ticarət gəmilərinin marşrutunun dəyişdirilməsi yanacaq sərfiyyatının, hücum riskinin çoxalması səbəbindən sığorta xərclərinin artmasına səbəb olub. Bununla belə, son bir ildə bu marşrutdan istifadə edən gəmilərin sayı 57 faiz artıb.
Musavat.com
