Ötən tədris ilində 1147 tələbənin kredit müraciətinə imtina verilib.
Musavat.com xəbər verir ki, bu barədə Təhsil Tələbə Krediti Fondunun icraçı direktoru Araz Paşayev "Media və təhsil dialoqu" mövzusunda keçirilən təlim-seminarda çıxışı zamanı deyib.
O qeyd edib ki, 2021-2022-ci tədris ilində təhsil tələbə krediti ilə bağlı 10 597 müraciət olub ki, onun da 7962-i yekunlaşdırılıb, 2635-i natamam hesab olunub.
Araz Paşayevin sözlərinə görə, kredit alan tələbələrin əksəriyyəti qadın olub:
"Kredit alan 6815 tələbədən 3786-sı qadın, 3029-u kişi olub.
Ali təhsilin bakalavr pilləsi üzrə 5795, magistr üzrə 849 nəfərə təhsil krediti verilib. Həmin müddətdə kreditlər üçün ümumilikdə 5 991 947 67 manat vəsait xərclənib".
Araz Paşayev tələbələri ən çox kredit alan universitetləri də açıqlayıb:
"Ən çox Azərbaycan Dövlət İqtisad Universiteti, Bakı Dövlət Universiteti və Gəncə Dövlət Universitetinin tələbələri kredit alıb".
Xalidə Gəray
Musavat.com
